Garrick Rees, ’n 13-jarige skoolseun van Curro College Hazeldean in Pretoria het verlede week sy vierde Suid-Afrikaanse titel vir 2017 op die sportveld ingepalm en nou mik hy na ’n vyfde.

Met Rees se oorwinning in die o.13 ouderdomsgroep by die Suid-Afrikaanse landloop kampioenskap in Potchefstroom is hy gekroon as nasionale kampioen in dié sportsoort. Hy het van die wegspring af die voortou geneem in die wedloop en daarna kon geen teenstander hom inhaal nie.

Dié titel het hy gevoeg by sy oorwinnings in die 800m en 1500m in sy ouderdomsgroep by die Suid-Afrikaanse skole atletiekkampioenskap vroeër vanjaar, terwyl hy ook in Julie as Suid-Afrikaanse judo kampioen in sy gewigsafdeling gekroon is.

By die nasionale skole atletiekkampioenskap is hy boonop aangewys as beste baanatleet (seuns) ná sy twee oorwinnings in die middelafstande.

Rees is een van die uitblinkers van die TuksJudo klub, waar hy deur die legendariese Nikola Flipov afgerig word. Flipov is ook die Suid-Afrikaanse Olimpiese afrigter.

As Rees sy sin kry sal hy oor sowat ’n maand sy vierde nasionale titel inpalm – hierdie keer op die stoeimat. Hy neem in Oktober deel aan die Suid-Afrikaanse jeug stoeikampioenskap en as huidige Gauteng-Noord kampioen in sy gewigsafdeling het hy dus ’n goeie kans om ook as Suid-Afrikaanse kampioen gekroon te word.

Rees hou reeds vyf verskillende titels in vier sportsoorte op provinsiale vlak. Behawe vir sy titel as Gauteng-Noord stoeikampioen hou hy ook provinsiale titels in atletiek (800m en 1500m), landloop, judo en stoei.

As dié begaafde sportman die nasionale stoeititel ook kan wen sal hy waarskynlik ’n prestasie behaal wat nog nie voorheen in Suid-Afrika reggekry is nie, aangesien hy dan ook vyf nasionale titels in dié vier verskillende sportsoorte sal hou.

Vir jou daaglikse gratis gemeenskapsnuus, besoek Rekord se webwerwe: