Onder leiding van hul uitstaande afrigters, Louis Nolte en Aidan Marsland, het die PMA Judoklub vanjaar puik prestasies behaal.

As een van die Tshwane Judo Assossiasie se top klubs het dié klub by die onlangse Suid-Afrikaanse Skole Judokampioenskappe, wat by die Universiteit van Johannesburg se Sowetokampus aangebied is, kragte gemeet teen die land se sterkste skole judokas.

Die kampioenskappe vind jaarliks plaas en sluit skoliere in tot op 14-jarige ouderdom.

Tydens die kampioenskappe het die PMA Judoklub ‘n uitstekende 27 medaljes verower om hulle suksesvolste jaar nóg op ‘n hoë noot af te sluit.

Hierdie prestasie van die klub se judokas het die kroon gespan op ‘n puik jaar wat ook gesorg het vir verskeie ander hoogtepunte.

Judokas van die PMA Judoklub het vroeër vanjaar meer as 60 medaljes by die SA Ope Judokampioenskappe in Bloemfontein ingepalm. Dié medaljes is gewen in die spanafdeling, kata en individuele gevegte.

Een van die klub se sterre, Brendan Pretorius, het vanjaar ‘n silwer medalje verower in die o.90kg afdeling by die Afrika Kadetkampioenskappe.

Vir jou daaglikse gratis gemeenskapsnuus, besoek Rekord se webwerwe: