Die prestasie van atlete van die Hoërskool Oos-Moot by verlede week se SA Skole kampioenskap in Potchefstroom het die kroon gespan op ‘n seisoen van puik vertonings vir dié skool.

Sewe atlete van Oos-Moot het aan die kampioenskap deelgeneem. Die skool het ‘n Suid-Afrikaanse kampioen opgelewer, terwyl nog twee Oosies medaljes verower het tussen die room van Suid-Afrika se skole-atlete.

Oos-Moot se groot trots was die prestasie van Ruan de Lange, wat as kampioen in die 110 meter hekkies vir seuns onder 17 aangewys is. De Lange het met Suid-Afrika se beste atlete in sy ouderdomsgroep afgereken om die goue medalje in dié item in te palm. Sy wentyd was 13,83 sekondes.

Jaco Kok van Oos-Moot het die silwer medalje verower in die spiesgooi vir seuns onder 17. Kok het die spies 63,54 meter ver gegooi vir dié prestasie.

Die skool se ander medaljewenner was Danae Jansen van Rensburg wat ‘n bronsmedalje verower het in die spiesgooi vir meisies onder 17. Haar poging van 46,03 meter was genoeg om aan haar dié derde plek te besorg.

Oos-Moot het boonop die prestasie behaal dat Chané van Zyl óók gekwalifiseer het om aan die spiesgooi vir meisies onder 17 deel te neem. Sy het kort op Jansen van Rensburg se hakke in die vierde plek geëindig met haar gooi van 45,26 meter. Van Zyl se prestasie word in perspektief geplaas deur die feit dat sy steeds ‘n onder 16 atleet is. Die byeenkoms het egter net voorsiening gemaak vir deelname in drie ouderdomsgroepe, naamlik onder 15, onder 17 en onder 19.

Evert Alderson (vyfde in die diskus vir seuns onder 17), LJ Viljoen (sewende in die paalsrpring vir seuns onder 17) en Francois Jacobs (negende in die paalsrpring vir seuns onder 17) was die ander atlete van Oos-Moot wat Gauteng op die kampioenskap verteenwoordig het.

Vir jou daaglikse gratis gemeenskapsnuus, besoek Rekord se webwerwe: