Kort na die verkiesing van die Blou Bulle Rugby-unie se nuwe president, Willem Strauss, het hy begin met ‘n aantal inisiatiewe om die amateur- en professionele sektore van rugby nader aan mekaar te bring.

Een van Strauss se eerste inisiatiewe was om te reël dat ‘n groep professionele spelers van die Bulls en die Blou Bulle saam met hul afrigters ‘n paar klubs besoek om interaksie tussen die gewone rugbypubliek en dié professionele manne te bewerk.

Hierdie inisiatief is reeds suksesvol toegepas by die Tuine Sportklub in die weste van Pretoria, asook by Noordelikes aan die anderkant van die Magaliesberg.

Op Woensdag 11 Julie kom Centurion Rugbyklub aan die beurt om ‘n besoek te ontvang van ‘n groep Bulls- en Bloubul spelers en bestuurslede.

Die Bulls se professionele afrigters en die spelers wat die klub gaan besoek sal op dié dag ‘n rugbykliniek aanbied vir die Centurion jeugklub se spelers. Alle jong spelers van Centurion en ondersteuners van die Blou Bulle is egter welkom om die geleenheid by te woon.

Daar sal ook ná die oefening geleentheid wees om spelers se handtekeninge te werf en om foto’s saam met die Bloubul helde te neem.

Die oefening sal om 16:00 begin en duur tot 18:00, waarna die spelers beskikbaar sal wees vir handtekeninge en foto’s. Toegang tot die klub sal gratis wees en alle belangstellendes word genooi om hul Bloubul helde te kom ontmoet.

Vir jou daaglikse gratis gemeenskapsnuus, besoek Rekord se webwerwe:

Rekord Oos

Rekord Noord

Rekord Centurion

Rekord Moot

Besoek ook ons Facebook, Twitter en Instagram blaaie.