Ná hul naelskraapse nederlaag teen Hoërskool Ben Vorster in die heel eerste wedstryd van die Virseker Beker toernooi, het Hoërskool Oos-Moot se eerstespan amok gemaak in die res van hul ligabepalings.

Die Oosies het ses wedstryde agtereenvolgens gewen in die Skild kompetisie van die Virseker Beker toernooi, waar hulle vanjaar ingedeel is. In die proses het hulle met top skole soos Pietersburg (40-19), Hugenote (63-3), Middelburg (41-32), Florida (45-3), Lichtenburg (44-12) en Jeugland (74-14) afgereken.

Ná hierdie kragvertonings het Oos-Moot tweede op die Skild kompetisie se punteleer geëindig en dit beteken dat hulle eerskomende Saterdag op hul tuisveld weer teen Lichtenburg te staan sal kom in die halfeindstryd.

Oos-Moot se onder-16 span is ook deur na die halfeindstryd, maar hulle moet ongelukkig Saterdag na Tzaneen reis om op Ben Vorster se sportterrein teen Hugenote te speel.

Die eerstespan se wedstryd sal die hoogtepunt wees van ‘n feesdag van rugby op Oos-Moot se veld. Die aksie sal reeds om 08:30 begin met die onder-14 halfeindstryd tussen Florida en Ben Vorster. Daarna volg die stryd tussen die onder-15 spanne van Ben Vorster en Lichtenburg (09:40), terwyl Middelburg en Jeugland se onder 16 spanne om 10:45 in die derde wedstryd in aksie sal wees.

Oos-Moot se eerstes sal om 12:00 teen Lichtenburg uitdraf.

Vir jou daaglikse gratis gemeenskapsnuus, besoek Rekord se webwerwe: