Ten spyte van al die frustrasie van die Covid-krisis, het Hoërskool Waterkloof se atlete vanjaar puik presteer en veertien van die skool se atlete het vanjaar die Atletiek Gauteng-Noord (AGN) span verteenwoordig by die Atletiek Suid-Afrika (ASA) se Jeug– en juniorkampioenskappe in die Paarl.

Onder hierdie Klofie atlete was daar ’n medalje-oes van sewe medaljes by die kampioenskap, wat insluit drie goud, een silwer en drie bronsmedaljes.

Verskeie atlete het ook puik persoonlike-beste vertonings gelewer, hoewel hulle nie die podium gehaal het nie.

Daar was vanjaar nie baie geleenthede om deel te neem nie, aangesien die seisoen erg gestrem is deur die Covid-regulasies. Hierdie feit maak egter die prestasies van skole-atlete soveel meer indrukwekkend, aangesien hulle al hierdie uitdagings moes aanspreek tydens hul voorbereiding.

Toeskouers by byeenkomste is ook gewoonlik ‘n groot aansporingsfaktor vir atlete, maar die klas van 2021 moes ook hiersonder klaarkom.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.