Ten spyte van die uitdagings wat die Covid-krisis vir alle skolesport in 2021 gebied het, kon die Northerns skole krieketligas wel afgehandel word.

Hoërskool Waterkloof se eerstespan is uiteindelik as die kampioen in Northerns se top skoleliga, die Platinum A1-liga, gekroon. Dié span het die seisoen onoorwonne afgesluit toe hulle Hoërskool Centurion in die eindstryd van die liga geklop het.

Dié liga is waarskynlik een van die heel moeilikste skole-ligas in Suid-Afrika en die Klofies se eerstespan moes op pad na die einstryd ook met ander top teenstanders soos Afrikaans Hoër Seunskool (Affies), Pretoria Boys High School, Hoërskool Garsfontein, Hoërskool Menlopark en Prestige College van Hammanskraal afreken.

Die Klofies het in hierdie ligafase soms die kenners laat regop sit met hul skitter krieket, veral toe hul aartsvyand, Garsfontein, ’n reuse pakslae gekry het. Waterkloof het in daardie wedstryd hul bure vir net 43 lopies uitgeboul, waarna hul openingskolwers die totaal maklik verbygesteek het vir ’n oorwinning met tien paaltjies.

Die seuns van Waterkloof moes boonop deur die loop van die seisoen die trauma van die dood van een van die skool se gewilde krieket afrigters, Japie Claasens, verwerk. Hy het na ’n lang stryd teen die Covid-virus gesterf.

Ten spyte hiervan en ook die moeilike program om al hul krieket verpligtinge te midde van die Covid krisis af te handel, het Waterkloof se eerstespan ’n uitstekende seisoen beleef.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.