Top amateur boksers in aksie in Pretoria
Amateurboks is terug met top aksie van 15 opwindende gevegte wat eerskomende Saterdag by die Dorsland Restaurant en Teater in die weste van Pretoria aangebied word.
Liefhebbers van amateurboks kry eerskomende Saterdag weer die kans om sommige van die beste jong plaaslike amateurs, asook besoekende boksers uit ander dele van Gauteng en ander provinsies in askie te sien in een van die grootste amateurboks-toernooie wat in ’n lang tyd in die stad aangebied is.
Vir boksliefhebbers lei alle paaie Saterdag-middag (10 Augustus) na die Dorsland Restaurant en Teater in die weste van Pretoria, waar RJ79 Events se Fight Night amateurboks toernooi aangebied sal word. Die toernooi sal in die vorm van die bekende “Box&Dine” konsep aangebied word, met die Dorsland Restaurant en Teater op die Zandfontein hoewes (Hoek van Rooikapokstraat en Van Der Hoff-weg) wat ook kroegfasiliteite beskikbaar sal stel.
Foto: Koos Venter
Verskeie klubs in Pretoria sal betrokke wees by hierdie toernooi, terwyl boksers ook uit ander provinsies soos Limpopo (Tzaneen), Mpumalanga (Nelspruit) en ander dele van Gauteng (Krugersdorp) sal opruk om deel van die aksie te wees.
Die toernooi sal bestaan uit 15 amateurboks gevegte van alle ouderdomme en gewigsafdelings, wat beloof om bokspuriste waarde vir hul geld te gee.
Rekord het onlangs die spoggerige nuwe gimnasium van Backhouse Boxing in Montana besoek, waar sommige van die boksers hard besig was met hul voorbereiding vir hierdie toernooi. Een van die belowende jong boksers by Backhouse Boxing is Michael Schutte, kleinseun van die Suid-Afrikaanse bokslegende, wyle Mike Schutte. Hy sal ook Saterdag in aksie wees in die kryt.
Foto: Koos Venter
Ander klubs uit Pretoria, soos die Tuine Tiere en Transnet Engineering Boxing Academy sal ook verteenwoordig wees by die toernooi.
Terwyl die aksie in die kryt reeds om 14:00 sal begin, sal daar ook ander vermaak wees in die vorm van die bekende kunstenaar, Jacques de Beer, wat teen 18:00 sal optree.
Vir meer besonderhede of om kaartjies of ’n tafel by die “Box&Dine” te bespreek, skakel RJ79 Events by 064-699-1200 of stuur epos na rj79events@gmail.com .
Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.
