Die Hoërskool Oos-Moot se rugbyspanne vaar besonder goed vanjaar en na die eerste paar wedstryde in die Beeldtrofee-reeks is dié skool se eerstespan reeds een van die gunstelinge om vanjaar die afdeling vir Grootskole in hierdie toernooi te wen.

Dié skool se eerstes en o.16 span het albei vanjaar koning gekraai by die gesogte Hansieweek, wat jaarliks in Naboomspruit aangebied word.

Tot dusver is albei die twee spanne ook goed op vorm in die Beeldtrofee toernooi. Daar was vooraf groot afwagting vir die afgelope naweek se tweestryd tussen Oos-Moot en die Hoërskool Tuine. Laasgenoemde het ook tot dusver vanjaar ’n goeie rekord opgebou, terwyl hul eerstespan verlede jaar die afdeling vir Grootskole gewen het. Daar is ook in die o.16 liga ’n reuse stryd verwag.

Oos-Moot het uiteindelik skoonskip gemaak teen Tuine toe al hul spanne teen hul teenstanders uit die Weste gewen het.

Die eerstespan het ses drieë ingeryg in hul oorwinning van 43-6 teen Tuine, terwyl die o.16’s ook maklik met 36-10 gewen het. Oos-Moot se o.15’s en o.14’s het albei vyftigtalle teen Tuine aangeteken.