Elk van Tom se houtskeppings ‘n besondere en unieke werk

POLOKWANE – Vir Tom Dorey (56) se kunstenaarshande is geen houtwerk te maklik of te moeilik nie.

Of dit kombuiskaste, klimrame of beddens is, Tom beskou elkeen van sy skeppings as ‘n kunswerk en hy omskep alledaagse items in meesterstukke.

“My liefde vir hout- en staalwerk het reeds op skool begin toe ek houtwerk as vak geneem het,” vertel hy.

“Na skool is ek na Potchefstroom waar ek onderwys studeer het. Ek het egter net vir ses maande skoolgehou voordat ek ‘n pos as bestuurder by ‘n groot maatskappy aanvaar het.”

Tom het in Nelspruit grootgeword en ook daar sy gr. 12-jaar voltooi. Later is hy na Tzaneen waar hy as areabestuurder van die maatskappy gewerk het.

“Ek het toe my werk verloor en het geen inkomste gehad nie. Toe besluit ek om maar weer houtwerk aan te pak. Ek bou ingeboude kaste, stapelbedjies, klimrame, kombuiskaste en afdakke,” vertel hy.

Vir Tom is die lekkerste deel van houtwerk wanneer sy klante gelukkig is. “Dit is ook lekker om met die hout self te werk, want ek ken hout en ek weet wat ek doen,” vertel hy.

Een van sy grootste projekte was toe hy drie jaar gelede 40 ingeboude kaste, ‘n kombuis en ontvangstoonbanke by Moriakerk moes insit.

“Ons moes dit binne ‘n week en drie dae klaarbou,” vertel hy.

Tom is getroud met Elsie. Saam het hulle een kind wat tans nog in die huis bly, maar uit vorige huwelike is daar sewe kinders altesaam.

“Ons het ook ‘n hoop kleinkinders,” sê Tom.

Tom is bereid om enige houtwerk-uitdaging aan te pak en het selfs al imposante werke, wat die boë voor in kerke insluit, gemaak.