Haar kollegas en familie vra gemeenskap vir geldelike bystand

POLOKWANE – Jaenri Botha (43), ma van drie kinders, is op 8 Augutus erg beseer in ‘n motor ongeluk in Marshallstraat.

Die kar waarin sy was, was getref  toe die bestuurder van ‘n ander voertuig die stopteken verontagsaam het.

Jaenri was na die Pietersburg Provinsiale Hospitaal gevat en opgeneem.

“Ongelukkig is die diens daar nie baie goed nie en wil ons haar graag oorplaas na die Steve Biko Akademiese Hospitaal in Pretoria omdat sy dringend hulp en behandeling benodig. Sy moet ook X-straal plate laat neem, maar dit moet by ‘n buite-praktyk gedoen word. Dit beteken sy moet haarself by die provinsial hospitaal ontslaan en dan kan sy nie sonder ‘n doktersverwysing weer daar opgeneem word nie,” vertel Elza Engelbrecht, ma van Jaenri.

Volgens haar is ‘n dokter in die stad wel bereid om hiermee te help, maar dan moet sy plek hê om oor te bly in ‘n hospitaal waar hy na haar kan kyk voordat sy dan weer in die provinsiale hospitaal opgeneem moet word.

Jaenri se nek het erg seer-gekry en haar nekwerwels het geskuif in die ongeluk.  Sy is ingelig dat ‘n operasie nodig is.

“Sy is nie verlam nie en kan haar hande beweeg, maar sy kry reeds die naalde-en-spelde-gevoel in haar hande wat nie ‘n goeie teken is nie.

“Sy kla ook van geweldige pyn agter haar linkeroor. Die dokter het vir my gesê sy het ‘n ernstige fraktuur in haar nek,” verduidelik Elza.

Jaenri is ‘n kostebewerkings- en faktureringsklerk by die werkswinkel van Mercurius Commercial, sy sien ook na Elza om en is die enigste broodwinner. Sy behoort nie aan ‘n mediese fonds nie. Haar kollegas en familie doen ‘n beroep op die gemeenskap om haar geldelik by te staan. Phillp Smith Prokureurs het ‘n trustrekening vir die doel oopgemaak.

Bank: Absa

Rekeningnommer: Phillip Smith Prokureur Trust

Rekeningnommer: R404 951 7074

Takkode: 632005

Verwysing: PP5073

Vir navrae kontak Mercurius Commercial by (015) 298 4700 of Phillip Smith Prokureurs by (015) 296 2119.