POLOKWANE – Review het met die Vakansiebere by Osieteddies Kleinkindontwikkelingsentrum gaan gesels oor wat hulle onder die boom vir Kersvader gaan los en wat hulle terug verwag.
Hanru Botha sê Kersvader bring vir hom geskenke en Kersvader moet gewoonlik broodjies en melk kry. “Ek soek Rollerblades vir Kersfees,” sê hy opgewonde.
Rueben Braack sê Kersvader moet ‘n piesang kry om te eet en water om te drink. “Ek hoop om ‘n gr. R fiets te kry.”
“Kersvader bring geskenke en hy eet net koekies en drink net melk,” vertel Ariel Brown. “Ek soek graag ‘n pienk fiets vir Kersfees,” glimlag sy.
Miané Coetzer is doodseker Kersvader bring net vir kinders geskenke. “Hy kan koekies en melk eet of biltong eet en Fanta drink. Ek wil graag ‘n mooi Barbie vir Kersfees hê.”
Henning Dafel vertel hy weet dat Kersvader eintlik sy pappa is en dat hy vir hom geskenke bring. “Hy moet sjokolade eet en Coca-Cola drink. Ek wil graag skietmannetjies en weermagmannetjies hê vir Kersfrees,” sê hy.
Mailee de Klerk sê Kersvader gee vir mense en kinders wat niks het nie geskenke. Hy eet volgens haar sop en koffie. “Ek wil graag ‘n baba ysbeer hê en ‘n pienk lawa lamp.”
Mariëtte de Lange stry en sê Kersvader bring vir almal geskenke. “Hy moet blaarslaai eet en Oros drink, en vir my asseblief ‘n New Born Baby pop bring.”
“Kersvader moet brood met water of koffie of melk kry en hy moet vir my ‘n resiesmotor met afstandbeheer bring,” vertel Tiaan Erasmus.
Luan Espag het besluit Kersvader kan lekkergoed en Oros kry. Hy wil graag gewere en messe hê, want hy hou baie van jag.
Isabella Giannulis wil graag ‘n foontablet en oorfone hê. Sy sal vir Kersvader sjokolade en Coca-Cola gee.
“Kersvader gee net vir die kinders geskenke,” vertel Lourens Gouws. “Hy eet biltong en sjokolade en hy drink sap. Kersvader moet asseblief vir my ‘n geweer bring.” Chloe O’Linsky sê Kersvader bring geskenke vir al die kinders en mammas en pappas. “Hy eet net koekies en melk. Ek soek graag ‘n pop by hom vir Kersfees,” glimlag sy opgewonde.
