Kontreifees se sukses lê in samesyn

Van vroegoggend tot laataand het leerders, personeel, oudleerders, ouers, vriende en familie Saterdag heerlik by Laerskool Pietersburg-Oos (Oosskool) se Kontreifees saam gespeel en gekuier.
Die dag het wyduiteenlopende aktiwiteite met twee pretdrawwe, ‘n fietsrit, 4×4-kursus, damestee en kolwyntjieversiering ingesluit. Na sononder het oud en jonk ‘n osbraai geniet terwyl groot name in Afrikaanse musiek, Mathys Roets, Matthys Maree en Anna Davel vermaak verskaf het. Sowat 200 entoesias­tiese deelnemers het aan die 2-in-1 wedloop deelgeneem wat deur Polokwane Atletiekklub aangebied is. Volgens Jason Stander, Oosskoolouer, eienaar van Jason Stander Optometrists en prysborg was dit ‘n gemaklike roete wat deelnemers terdeë geniet het.
BB Auto het ‘n 4×4-kursus by die Polo­kwane 4×4-baan aangebied en deelnemers het mekaar goed tussen die hindernisse en slaggate leer ken.
Tydens die damestee het voormalige Polo­kwane-inwoner en Kokkedoorwenner 2014, Johnny Hamman gewys hoe om ‘n Viëtnamese broodbakkie met ‘n vulsel te maak. Elke tafel se gasvrou moes ‘n rysslaai voorberei en Celeste Nel-Fouché is as wenner aangewys. Carina Bronkhorst en Yana Mockford se tafel was die mooiste gedek.
Plaaslike gesondheidsraadgewer, Christine Venter het ook oor gesonde eetgewoontes gepraat. Amiel Robbertze het die kolwyntjieversiering-kompetisie gewen en met ‘n Bluetooth luidspreker weggestap.
Tydens die osbraai is Vriende van Oosskool bekendgestel. Dié organisasie het dit ten doel om geld in te samel wat ten bate van die skool sowel as minderbevoorregte leerders aangewend sal word.
Beheerliggaamvoorsitter, Andri Weyer het sy dank teenoor die organiseerders en ouers uitgespreek en gesê die Kontreifees word ‘n jaarlikse instelling.

Storie en foto’s: Alet-Elize van Jaarsveld
>>alet-elize@observer.co.za

Hooffoto: Johnny Hamman besig met ‘n kookdemonstrasie.