Merke, gereed, hol
Passie bruis in Gerda du Toit se are wanneer sy die plaaslike atlete in die middag op die atletiekbaan- en veld afrig.
PASSIE bruis in Gerda du Toit se are wanneer sy die plaaslike atlete in die middag op die atletiekbaan- en veld afrig.
Gerda is ‘n groot sportliefhebber en haar liefde vir atletiek kom al van haar jong dae af toe sy provinsiale kleure in dié sportsoort verwerf het. Haar gunsteling item was die 100 m.
Sy vertel ook dat sy ‘n groot liefde vir kinders het en dat sy graag help, ook diegene wat nooit ‘n kans kry nie, want hulle kan deel van ‘n aflosspan word met genoeg aanmoediging en oefen. Sy het eers slegs haar dogter op die baan bygestaan en in 1988 professioneel begin afrig.
Gerda gee graag erkenning aan haar dogter, Mari wat haar help om die oefenprogramme vir haar Running Rebels atletiekspan uit te werk. “Sonder my dogter sal ek die taak moeiliker aanpak. Sy help my baie met raad”, vertel sy.
“Ek is bekend as ‘n kwaai afrigter. Ek glo absoluut in dissipline, want as jy dit nie op die atletiekveld kan wys nie, sal jy nooit dissipline in die buitewêreld kan uitstraal nie.”
Gerda het tans sowat 52 atlete van Laerskool Krugerpark en Hoërskool Piet Potgieter wat sy afrig. Dit maak haar so trots dat een van haar atlete, Jana Nel (12), ‘n verspring rekord gebreek het wat haar eie dogter, Mari 28 jaar gelede opgestel het. Mari se afstand was 4,38 m en Jana het met ‘n afstand van 4,51 m met haar hakke in die sand geploeg.
Een van haar naelloop atlete, Jayden Enslin is aangewys as die beste naelloopatleet by Laerskool Krugerpark en by Hoërskool Piet Potgieter hou Mogaka Masenene dieselfde titel.
Du Toit wens haar hoërskoolatlete sterkte toe met die komende interhoër wat in Thabazimbi plaasvind en sien daarna uit dat ‘n paar van hulle moontlik later aan die SA’s sal deelneem. “Om te wen is nie alles nie, maar om te wil wen is alles”, is haar lese en sy wil graag hê haar atlete moet dit onthou wanneer hulle die wenpaal nader.
