POLOKWANE – Leerders mag wel hoop dat hul gelykstaande is aan hul portuurgroep wat baie dinge betref, maar die waarheid is dat hul eintlik in baie opsigte hemelsbreed verskil. Vra enige opvoedkundige sielkundige oor studiemetodes en hy sal jou vertel van al die verskillende metodes wat daar is. Hy sal ook vir jou vertel dat elke kind anders leer as die vorige of volgende een.
As jy na skool langs die rugbyveld of netbalbaan staan, is daar dikwels ‘n mamma wat vertel hoe sy nog opsommings vir haar kind moet maak voor dié se toets en so dikwels sien ‘n mens op Facebook van mense wat aanbied om teen betaling vir jou kind opsommings te maak.
Review het met ‘n onderwyser by Laerskool Pietersburg-Oos, Rita Gadney, gesels oor hoe dit jou kind kan bevoordeel, of benadeel as jy, of ‘n ander volwassene, hul opsommings vir hul maak.
Rita is reeds 29 jaar ‘n onderwyser en sê dat skoolgee en die kinders haar passie is. Sy vertel daar is voordele en nadele daarin vir ouers om die opsommings te maak.
“As leerders gr. 4 toe gaan is dit nodig om die aanpassing in senior-fase makliker te maak as mamma help met opsommings. Maak net seker hoe jou kind die maklikste leer. Daar is verskillende maniere, onder andere, deur ‘n breinkaart met kernwoorde of vrae en antwoorde.
“Ouers moet leerders motiveer en hulle vrae vra oor wat hulle geleer het. Hulle moet nie net soos papegaaie leer nie, maar moet leer om inligting en sketse neer te skryf of te teken, met ander woorde sien, hoor, skryf en antwoord.”
Sy vertel dat sy weet ouers ‘n groep vorm waar elkeen ‘n ander leerarea opsom en dit dan uitruil om tyd te bespaar.
“Leer jou kind geleidelik, van gr. 5 af, om opsommings self te maak. Hulle moet leer om dit self te doen, dit moedig hulle aan om selfstandig en met selfvertroue te werk en motiveer hulle ook. Daar is gevalle waar leerders disleksies is, of aan aandagsgebrek-hiperaktiwiteitstoornis (AGHS) ly, en meer aandag en tyd verlang om te leer.”
Volgens Rita is die nadele dat ouers die kinders bederf deur alles vir hulle te doen. “Dit sluit in take en huiswerk en die kinders leer dan soos papegaaie. Moenie vir hulle alles met ‘n lepel voer nie. Gaan die ouer saam met sy kind universiteit toe, om saam klas by te woon, opdragte uit te voer of eksamen en toetse te skryf?
“Ongelukkig is baie ouers van vandag ingestel op prestasie, akademie en sport en my kind moet beter wees as jou kind.
“Kinders moet gebalanseerd wees. Daar moet tyd vir akademie, sport en kultuurdeelname wees. Hulle moet ook tyd hê om nog ‘n kind te wees wat speel, en nie heeltyd op hulle selfone of rekenaar doenig wees nie.”
