‘n Winterwonderwêreld om PHS se matrieks te groet

Sneeu in September is ‘n raar en byna ondenkbare verskynsel in Polokwane, maar met dié tema het Hoërskool Pietersburg (PHS) daarin geslaag om verlede Woensdag vir graad 12-leerders ‘n buitengewone afskeid aan te bied wat al die ele­mente van ‘n ware sneeutoneel bevat. Blink sportmotors en vete­raanvoertuie het die meeste leer­ders stylvol by die skool besorg. Seuns was in deftige aandpakke geklee terwyl meisies se gesofistikeerde uitrustings die koppe laat draai het. Donkerblou het in die keuse vir aand­rokke geseëvier, terwyl die jong manne verras het met ‘n verskeidenheid bykomstighede wat gewissel het van dasse en borsspelde van hout tot veelkleurige sokkies.
Die groep baie belangrike gaste is op ‘n rooi tapyt tot in die skoolsaal begelei waar reuse sneeubedekte bome, denneballe en spierwit dekor die tema tot op die tafels in die fynste detail met duisende liggies, glaskandelare en spieëls deurgetrek het. Ina van der Merwe, leerkrag, was aan die stuur van die reëlings­komitee.

Storie:RC Myburgh
>>rc.observer@gmail.com

Foto’s: RC Myburgh
>>rc.observer@gmail.com
YOLANDE NEL
>>observer.yolande@gmail.com
ELNA ESTERHUYSEN
>>observer.elna@gmail.com