Ronde rol in by HPP-wynveiling
Hoërskool Piet Potgieter se wynveiling is elke jaar ‘n spoggeleentheid en vanjaar was geen uitsondering.
MOKOPANE – Die rooitapytglansaand het gesorg vir goeie wyne vanuit die Wes- en Noord-Kaap wat opgeveil is tot middernag. Daar is gebie op 128 lotte, waarvan die duurste lot, lot 126 was, ‘n stille tender, wat vir R6 150 verkoop is.
Lees ook: [FOTO’S] Top wynveiling by Piet Pot
Die 200 gaste het verlede Donderdagaand hulle beste voetjies voorgesit op die rooitapyt voor die Pierneefsaal voordat hulle na binne is om saam te kuier en te smul aan ‘n heerlike driegangmaaltyd voorberei deur die gasvryheidsonderwysers, Lorina do Santos en Nicolene Venter saam met hulle gasvryheidsleerders.
Die wynveiling is ‘n jaarlikse fondsinsamelingsprojek van die skool wat vanjaar vir die sewende keer gehou is. Dit is die breinkind van die sakeman, CP van der Walt, sy vrou Gertru en Paarl Gimnasium.
Jaco van der Wateren, seremoniemeester en organiseerder sê daar is ‘n mooi geskiedenis agter die veiling.
“Van der Walt en Paarl Gimnasium het oorspronklik met die idee vorendag gekom en alle wins verdeel. Na vier jaar moes HPP op eie stoom voortgaan nadat Paarl Gimnasium onttrek het. Dit is nou drie jaar wat ons dit op ons eie hanteer en alle wins kom 100% na die skool toe. Ek haal my hoed vir CP af. Hy is ‘n oud-leerder van die skool en sy kinders is ook nie meer op skool nie, maar hy is steeds deel van die geleentheid.”
Van der Wateren sê hy en CP gaan in Maart elke jaar na die wynlande om borge vir die wyn uit te soek en hulle bloot te stel aan die geleentheid. “Byna 96% van ons wyne kom uit die Wes-Kaap en die res uit die Noord-Kaap, Kalahari-gebied.”
Aan die einde van die aand was daar R277 050 in die skool se geldkas, maar uitgawes moet nog hieruit verhaal word. Jimmy Steele, Skoolhoof, bedank almal wat deel van die organisering was en die geleentheid ondersteun het.
