POLOKWANE – Oosskool se leerders het verlede Woensdag hulle groen, wit en oranje uniforms by die huis gelos en soos trotse Springbokke skool toe gegaan om skoolhoof Gideon Pelzer se verjaardag te vier.

Pelzer verjaar op 11 Mei en elke jaar word hy behoorlik bederf.

Hierdie jaar was die tema van sy partytjie ‘Springbokke’ en sy verrassinggeskenk was ‘n besoek van sy gunsteling Springbokspeler, Bakkies Botha.

Ten aanskou van die skool het Pelzer in ‘n Toyota Land Cruiser by die skool opgedaag waarna hy op die skrummasjien geklim het en van die rugbyspelers die masjien gestoot het.

Na luide toejuiging en applous, het stilte oor die rugbyveld geheers tot Bakkies Botha tussen die pawiljoene deurgestap gekom het.

Dit was beslis ‘n groot verrassing vir Pelzer en ongetwyfeld ‘n oomblik wat hy sal onthou.

Hierna het die hoofleiers ‘n paar rugbyverwante lewenslesse met die skool gedeel. Dit sluit in spanwerk, doelwitte, volharding, strategie en veerkragtigheid.

“As ons terugkyk op al die hoogtepunte en struikelblokke wat ons Osies al oorkom het, is dit duidelik dat Meneer nie net ‘n skoolhoof is nie, maar ‘n mentor, vriend, goeie rugbyafrigter en ‘n ware leier,” het Mila Veldman, onderhoofmeisie vir kultuur in haar toespraak opgemerk.