Goeie nuus vir jong Dezi van Huyssteen (10)
Dokters het Dezaray van Huyssteen aanvanklik met ‘n virus gediagnoseer en behandel en op 6 Januarie was daar vir die eerste keer positiewe nuus vir die gesin.
POLOKWANE -Dezaray van Huyssteen, beter bekend as Dezi, en haar ouers Basie en Makkie moes die afgelope drie jaar talle uitdagings oorkom.
Bosveld het voorheen berig dat die liefdevolle 10-jarige meisie, wat die stryd van nierversaking sedert 2022 voer, tans 12 ure per dag dialise ontvang terwyl daar gewag word op toetsuitslae.
Lees ook: Mokopane maak hande en beursies oop vir Dezi
Kristalle is gediagnoseer op Dezi se niere en as die probleem geneties is, kwalifiseer familielede nie as skenkers nie.
Op 6 Januarie was daar vir die eerste keer positiewe nuus vir die gesin.
“Die genetikatoetse het negatief gedui,” het Makkie bevestig, en gesê die gesin sien uit na die volgende stap, wat ‘n nieroorplanting is. Ek gaan my nier skenk, en die proses gaan sowat ‘n jaar duur met al die nodige toetse en om goedkeuring vanaf die mediese fonds te bekom.”
Lees ook: Dezi (9) het Mokopane se hulp nodig
Die gesin is steeds dankbaar teenoor die gemeenskap en besighede wat hulle finansieel bystaan.
“Ons is al ‘n stap nader aan genesing en wil ons weereens aan elkeen dankie sê vir die skenkings wat ontvang is sowel as elkeen se gebede.”
