Olieverf gee Cornet Kleynhans se drome en passie kleur

POLOKWANE – Met ‘n foto in haar hand en ‘n wit muur as verfdoek, beplan Cornet Kleynhans reeds haar volgende stap.

As kunstenaar geniet sy dit om skilderye en kommissiewerk te doen, en pas sy haar kunswerke aan by die behoeftes van haar kliënte.

Cornet se liefde vir die kunste het reeds as jong meisie begin toe sy saam met haar pa na-uurse kunsklasse bygewoon het.

Sy was net 12 jaar oud. Op hoërskool het sy kuns as vak geniet, waarna sy BA beeldende kunste gaan studeer het met spesialisering in inligtingsontwerp.

“Daar was ‘n tyd wat ek argitektuur wou studeer, maar dit was net ‘n fase. My pa het altyd geglo ek moet studeer, en ek het uiteindelik op kuns besluit. Dit was uitdagend, want ek het gevoel ek is nie op dieselfde vlak as die studente wat by Pro Arte Alphen Park was nie,” vertel sy.

Cornet sê sy probeer die persoon op die doek so realisties moontlik vasvang.

“Ek verf graag mense se gelaatstrekke. Ons het anatomie gehad en moes dit goed ken om mense reg te kan uitbeeld. Dit is ‘n uitdaging, maar ek geniet dit baie. Landskappe is weer nie vir my so lekker nie.”

Sy verkies om met olieverf te werk omdat dit duursaam is en lank hou.

“Ek kan my werk vernis en ‘n glans gee, en sodoende meer diepte skep. Ek gebruik soms akriel omdat dit vinniger droog word.”

Cornet glo haar werk moet lewe hê en haar studente inspireer.

Haar geloof weerspieël ook in haar temas, en sy verkies om nie donker of depressiewe onderwerpe te skilder nie.

“Om nuut en uniek te wees is moeilik. Mense verf nie meer stillewes nie, maar ek hou daarvan om verskeidenheid in my werk te hê.”

Sy neem graag self foto’s wat sy omskakel in skilderye en verkies ook om goeie portrette van mense vas te lê.

Bome, voëls en die lug is temas wat haar aantrek. Voor sy enige werk aflewer, sorg sy dat sy heeltemal tevrede is.

Meesters soos Leonardo da Vinci en Michelangelo beïnvloed haar kuns, en net soos hulle, gebruik sy ‘n groen onderlaag in haar skilderye.

“Ek geniet my kunsstudente baie. Dit is vir my wonderlik as hulle leer en ek my kennis kan deel. Ek wil nie groot of bekend wees nie, ek wil net die kuns geniet. Ek doen ook gereeld kursusse om my eie kennis verder uit te brei,” sê sy.