Oom Jules sal onthou word vir sy vrygewige gees

POLOKWANE – Dié wat vir Jules Coetzer, beter bekend as Oom Jules geken het, weet hy was bekend vir sy sagte hart en vrygewige gees – ‘n man wat beslis ‘n onuitwisbare indruk gemaak het.

In gesprek met sy vrou, Isabel, het sy gedeel watter dinge na aan sy hart was, en drie het uitgestaan: rolbal, goeie wyn, en familie. “Jules was baie betrokke by die bekendstelling van ons kleinkinders aan die sport van rolbal.

Hy het hulle van jongs af die spel geleer, en dit was vir hom ‘n groot vreugde om te sien hoe hulle groei en hul vaardighede ontwikkel. Hy was baie trots op hulle prestasies,” vertel sy.

Al het Jules nie kinders van sy eie gehad nie, vertel Isabel hy was ‘n toegewyde en liefdevolle vaderfiguur én oupa – vir sy vorige vrou se kinders, haar eie kinders, asook haar kleinkinders. “Sy liefde en leiding het ‘n groot invloed op hul lewens gehad, en het gehelp om hulle te vorm tot wie hulle vandag is.”

Sy onthou hoe Jules gedurende warm somersaande meestal buite deurgebring het met ‘n glas droë rooiwyn – ‘n belangrike deel van sy ontspanroetine. “Hy was lief vir sy tuin en vir ons huis. Hy het altyd gesê: ‘Dankie dat jy ons huis so mooi maak.’ Stil oomblikke, omring deur geliefdes, het vir hom vrede en vervulling gebring.”

Coetzer, wat onlangs in die ouderdom van 88, skaars vyf dae voor sy 89ste verjaardag, oorlede is, het volgens Isabel, ‘n hart van goud gehad.

“Sy medelydende geaardheid en bereidwilligheid om ander te help, het hom die respek en bewondering van die gemeenskap besorg. Hy was ‘n pilaar van krag vir sy familie, altyd gereed om te luister of te help.”

‘n Goeie, mediumgaar steak met ‘n aartappel perfek gaargemaak, was een van sy gunstelingmaaltye, maar dit was altyd die geselskap van geliefdes wat vir hom regtig saak gemaak het. Isabel voeg by dat die natuur vir hom ‘n bron van inspirasie was, “hy het vrede gevind in die tuin, veral in die kyk na voëls en die skoonheid van die buitelewe”. Een van sy geliefkoosde uitdrukkings was: “Genugtig, I love you my angel,” vertel sy.

Coetzer het deur die jare elke posisie op die Polokwane Rolbalklub se komitee beklee: van baanopsigter, tesourier, kompetisiesekretaris, kroegman, sekretaris, instandhoudingsbeampte, vise-president tot president. Later is hy as lewenslange lid van die klub vereer. Isabel sê dit was die enigste rolbalklub waaraan hy ooit behoort het. Weens swak gesondheid moes hy egter ophou speel, maar het steeds ander spelers aktief gehelp om hul spel te verbeter.

Oorspronklik van die Oos-Kaap, het Jules in 1986 na Polokwane verhuis vir werk. Die afgelope 20 jaar was hy ‘n inwoner van die Koraal Aftreeoord. Sy liefde vir rolbal het op die jong ouderdom van 10 begin – ‘n passie wat hom tot aan die einde bygebly het.

Coetzer se gedenkdiens is op 15 Augustus by die Polokwane Rolbalklub gehou. Sy laaste wens was om veras te word, en dat sy as in Sandbaai naby Hermanus uitgestrooi moet word, waar hy sy finale rusplek sou vind.

“Terwyl Polokwane en die rolbalklubgemeenskap terugkyk op Jules se lewe, word ons herinner aan die belangrikheid van familie, liefde en goedhartigheid. Sy nalatenskap leef voort in ons harte, en ons sal altyd die tyd saam met hom koester. Mag sy siel in ewige vrede rus,” het sy afgesluit.