POLOKWANE – Groot skool: iets waarna bykans elke kind uitsien, maar wat ouers maklik angstig maak. In die dae voor die eerste kwartaal begin, voel ouers en gr.1-leerders dikwels ’n draaikolk van emosies: ’n maag wat draai, ’n knop in die keel, en soms selfs trane.

Polokwane Review het by Madeleen Willemse, gr.1-onderwyser by Akademie Reformia, gaan vra vir wenke om die dag makliker te maak:

1. Gesonde ontbyt:

“Dit is nie ’n mite nie. Kinders wat met ’n leë maag of windpap begin, kan nie eens tot 08:00 of 09:00 uithou nie. Hulle raak kriewelrig en vra voortdurend wanneer dit pouse is.”

2. Roetine:

“Kinders moet weet wat van die dag verwag word. Dit help om hulle nie oor die randjie te stuur nie, en dit is tot voordeel van ouers en leerder.”

3. Genoeg slaap:

“Gr.1-leerders moet teen 20:00 reeds geëet, gebad en in die bed wees.”

4. Huiswerkhulp:

“Skep ’n rustige, kalm atmosfeer om te ondersteun wanneer hulle oorweldig voel.”

5. Prioritiseer huiswerk, maar wees realisties:

“Die aarde gaan nie vergaan as een middag se huiswerk oorslaan nie. Maar leer hulle die waarde van daaglikse huiswerk – dit bou goeie gewoontes.”

6. Stel belang en prys deursettingsvermoë:

“Die klein suksesse soos klanke, lees of eenvoudige wiskunde lyk dalk eenvoudig, maar dit is harde werk vir ’n gr.1-leerder.”

7. Speel saam:

“Kinders word gou groot. Moenie enige geleentheid misloop om hulle kindwees te koester nie.”

8. Gesonde kosblikke:

“Koekies vol suiker, gaskoeldrank of sjokoladesmeerbroodjies maak dit moeilik vir kinders om na pouse te konsentreer.”

9. Rapport:

“Moenie dat bekommernis oor punte die kans steel om hierdie kosbare jaar saam met jou kind te geniet nie. ’n Goeie grondslag is belangrik, maar geen gr.1-punte gaan universiteitstoelating affekteer nie.”

10. Geniet dit saam:

“Dis dalk ’n cliché, maar hierdie jaar gaan binne ’n oogwink verby.”

Polokwane Review nooi ouers om hul Gr. 1-foto’s met ons lesers te deel en saam die feesviering van die eerste skooldag te beleef.