POLOKWANE – Henk Meyer van Malan Seuns het lede van die Pietersburg Tuinbouklub onlangs toegespreek oor vrugtebome en hoe om dit behoorlik te onderhou vir optimale vrugteproduksie.

Hy het beklemtoon dat die versorging van vrugtebome nie net oor estetika gaan nie, maar oor die bevrediging om self vrugte te kan oes.

“Almal van ons wil altyd self die vrug van die boom af pluk. Dit is geesvervullend om dit te kan doen, en daarom moet ons na ons vrugtebome kyk,” het hy gesê.

Vier kernbeginsels vir gesonde vrugtebome

Meyer het verduidelik dat die hoofdoel van snoei is om groter en beter vrugte te verkry, en het vier kernbeginsels uitgelig: gebalanseerde kunsmis, korrekte snoei, optimale watergewing en effektiewe bestuiwing deur bye.

Volgens hom is daar ook vier basiese riglyne wanneer bome gesnoei word: dooie takke moet verwyder word, asook takke met siektes, beskadigde of gebarste takke, en takke wat kruis.

Twee belangrike snoeimetodes

Hy het twee hoof snoeimetodes verduidelik. Die eerste is die V-vorm, waar die middel van die boom oopgemaak word om lig in te laat. Hierdie metode word algemeen gebruik vir perske-, appelkoos- en nektarienbome.

Die tweede metode is die sentrale leiersnoei, waar ’n enkele sterk stam gehandhaaf word met sytakke wat na buite groei. Hierdie metode word gebruik vir appel-, peer- en sitrusbome.

Voeding en plantsiektes

Meyer het ook die belangrikheid van behoorlike voeding beklemtoon en verduidelik dat grond in Afrika dikwels arm is en kunsmis nodig het, wat in mikro- en makro-elemente verdeel word.

Hy het gewaarsku teen algemene plantsiektes en plae, en gesê tuiniers moet oplet vir simptome soos verwelkende blomme, geel blare en poeieragtige lae op blare.

Watergewing bly deurslaggewend

Ten slotte het hy lede aangeraai om water eerder in die oggend toe te dien en handsproeiers te gebruik.

“Daar is net twee redes waarom ’n plant doodgaan: te min water of te veel water,” het hy afgesluit.