POLOKWANE – Dit is nie almal wat die band tussen ’n troeteldier en sy mens verstaan nie.

Vir baie mense is ‘n troeteldier bloot ’n hond, kat, voël of vis. Tog ken almal iemand vir wie ’n troeteldier soos ’n kind is, soms selfs hul enigste kind.

Een ding waaroor die meeste troeteldiereienaars saamstem, is die hartseer en pyn wanneer ’n geliefde troeteldier sterf.

René Rossouw is ’n diere-ma wat dié pyn ken en verstaan.

Die begin van Petkidz

Nadat sy finaal van Snupi moes afskeid neem en ’n skoolreünie misgeloop het, het die idee vir Petkidz ontstaan.

“Petkidz is ’n passievolle, jong besigheid wat emosionele ondersteuning wil gee aan diere-ouers wat diere-kinders verloor. Ek was intens daarvan bewus dat diereverlies nie sosiaal ondersteun word nie en het besluit om ’n begeleidingsgids te skryf.”

René sê troeteldiere word toenemend as mense verpersoonlik: Hulle word in menslike rolle ingenooi en neem daarmee saam groter dele van hul eienaars se harte in.

Dis ’n verlies wat geldig is en respek verdien.

Die boek

Haar boek, ‘Die Leë Leiband – Diereverlies, Rou en Heling’, het hieruit voortgespruit.

Tydens haar navorsing het René besef daar is min bronne oor die onderwerp.

“Daar was ’n paar outobiografieë van diere-ouers wat hulle stories vertel, maar nie baie wat ’n sielkundige onderbou bied nie. Ons moet weet wat met ons gebeur en hoekom dit ons so diep raak. Daar is geweldig baie materiaal beskikbaar om ons te help met menseverlies en rou, alhoewel baie min van ons regtig weet hoe om iemand anders te troos met ’n stukkende hart.”

In 2024 het René die maatskappy Petkidz gestig – met ’n ‘z’, want, soos sy sê, “ons dierekinders het sterte”.

Wat diereverlies uniek maak, is die feit dat ons intense trauma beleef in die proses. Dis nie vir ons morele kompas normaal om ‘gesinslede’ dood te maak nie, al weet ons dit is ’n genadedood en sekerlik die mees onselfsugtige en liefdevolste offer wat ons ooit kan bring om ’n geliefde te help. Dit skree teen ons stroom en laat baie van ons met selfverwyt en skuldgevoelens

Sy verduidelik dat die rouproses gewoonlik in isolasie plaasvind, aangesien diereverlies in baie opsigte sosiaal misken word en daar min ondersteuning is wanneer ’n mens se hart uitmekaar val.

“Jy werk deur dieselfde rouproses as iemand wat mensverlies moet hanteer. Om die een of ander rede dink ons dit gaan makliker wees om oor die verlies van ’n diere-kind te kom as oor die verlies van ’n geliefde. Ons emosies gee nie om wie dood is nie. Ons weet net ons hart is stukkend. Die meeste mense is nie bewus van die emosionele prosesse waaroor hulle geen beheer het nie en Petkidz wil begrip en ondersteuning bied.”

Die rou proses

Tydens haar navorsing het René verskeie groepe geïdentifiseer wat besonder kwesbaar is vir diepe rou en verlies. Dit sluit enkelinge, bejaardes, families met kinders en die diensdiergemeenskap in, waaronder mediese, terapeutiese, gids- en sekuriteitsdiere val.

Al die diere van hierdie groepe speel ’n dubbele rol in terme van kameraadskap of vriendskap en funksionaliteit. Wanneer daar skeiding met hierdie diere kom, sluit die pyndrempel nie net ’n liefdesverlies in nie, maar ook uitdagings soos komplekse rou en trauma.

Hierdie trauma word dikwels in isolasie verwerk, aangesien die samelewing dit nie altyd as geldige rou erken nie.

“Petkidz se uitgangspunt is dat liefde nooit werklik verloor kan word nie, maar dat dit omgeswaai kan word om ’n ewige seën te bly. Daardie een verskriklike dag van skeiding moet nie al die jare se geluk, vreugde en seëning vervang nie.”

René sê sy het al mense ontmoet wat dit steeds moeilik vind om onverwerkte rou of trauma te hanteer, al is dit langer as twee jaar.

Petkidz bied verskeie dienste aan, wat op die webtuiste www.petkidz.co.za beskikbaar is:

• Empty Leash – Begeleidingsboek (‘Die Leë Leiband’): Die boek neem die leser op ’n reis vanaf die hartseer en trauma deur die rouproses tot heling.
• Paws Place – Troosgesprekke: Berading vir diere-ouers wat sukkel om die verlies te verwerk, asook ’n ruimte waar hul ’n huldeblyk aan ’n geliefde troeteldier by Legacy Tails kan laat.
• Pawsome Services: Plaaslike entrepreneurs word genooi om dienste soos troeteldieroppas en versorging hier aan te bied.
• Discovery Tails: YouTube- en ander internetskakels wat mense help om meer kennis oor diereverlies op te doen.
• Sit Happens: ’n Blog wat relevante vrae hanteer, soos hoe om kinders deur diereverlies te help.