POLOKWANE – Enige ouerpaar se grootste vrees is dat iets met hul baba sal gebeur.

Plaaslike inwoners Matthew en Cleoné Llewellyn se opgewondenheid oor die koms van hul babaseuntjie, moes egter onlangs onverwags plek maak vir groot onsekerheid toe Cleoné op 23 weke swanger in Dubai in kraam gegaan het.

Die egpaar was op ’n kort vakansie toe Cleoné, drie dae voor die einde van hul reis, kraampyne begin ervaar het.

Ons het die vorige dag nog tyd op die strand spandeer en kort voor die pyne begin, in die swembad geswem. Binne die eerste uur nadat Cleoné se pyne begin het, het ek besef hier is fout. Daar is gelukkig ’n Mediclinic Hospitaal ongeveer 10km van ons af, so Cleoné kon vinnig behandeling kry. Sy was reeds 7cm ontsluit.

Matthew vertel dat hulle geskok was oor hoe vinnig die situasie verander het. Die swangerskap is nie as ’n hoërisikoswangerskap beskou nie, en hulle het geen rede gehad om te verwag dat iets verkeerd sou loop nie.

Dokters kon die kraam tydelik stop. Cleoné is tans onder die sorg van vier spesialiste, wat hoop om die swangerskap met nog vyf weke te verleng sodat hul seuntjie meer tyd het om te ontwikkel.

Die mediese span het die egpaar voorberei op die moontlikheid dat hul baba egter vir ’n baie lang tyd in die neonatale intensiewesorgeenheid (NICU) sal moet deurbring.

“Die dokters het ons voorberei op moontlik tot 100 dae,” vertel Matthew.

Volgens hom bied die hospitaal intensiewe sorg aan uiters premature babas, met die hoop dat hulle ondanks hul vroeë geboorte gesond genoeg sal word om huis toe te gaan.

‘n Lang pad terug huis toe

Die Llewellyns weet dat hulle moontlik nog drie tot vier maande in Dubai sal moet bly. Hul seun is daar gebore en moet volgens die huidige plan minstens 1.8kg weeg voordat hy veilig genoeg sal wees om saam met hulle na Suid-Afrika terug te keer.

Die verlengde verblyf bring groot finansiële druk mee. Hoewel hul mediese fonds na verwagting ’n deel van die koste sal dek, sê Matthew dat uitbetalings volgens Suid-Afrikaanse tariewe bereken kan word, terwyl mediese sorg in Dubai aansienlik duurder is.

Hul reisversekering dek Cleoné se uitgawes, maar die dekking vir die baba sal eers ná sy geboorte bevestig kan word.

Ons is onseker oor die rekeninge en hoeveel dit gaan wees. Ons het na baie mense uitgereik. Ons is dankbaar vir ons geliefdes wat wel help en ons is seker dat die Here ons uitkoms sal gee om die hospitaal terug te kan betaal.

Benewens hospitaalonkoste is verblyf duur, en die paartjie se onvermoë om tans te werk beteken dat hulle ook inkomste verloor. Vervoer en kos is relatief bekostigbaar, maar die koste van ’n lang verblyf in ’n vreemde land bly ’n groot uitdaging.

Matthew sê hulle is diep dankbaar vir almal wat reeds hulp verleen het. Tog is hul grootste behoefte in hierdie stadium gebed, veral dat die versekering regverdig en volgens die toepaslike bepalings hanteer sal word.

Geloof en ondersteuning in ‘n vreemde land

Hoewel hulle ver van hul familie en vriende in Suid-Afrika is, sê Matthew dat die ondersteuning van ander Suid-Afrikaners in Dubai hulle minder alleen laat voel.

Hulle het mense ontmoet wat hulle selfs na hul huise genooi het om saam kerk te hou, aangesien sulke byeenkomste nie in openbare ruimtes mag plaasvind nie.

Vir die egpaar het dié gebare van omgee ’n besondere betekenis gekry in ’n tyd waarin hulle nie weet wat die volgende dag gaan inhou nie.

Matthew sê die ervaring het hul afhanklikheid van God en hul vertroue in Sy voorsiening verdiep.

Ons het ’n diepe waardering teenoor almal wat bydra om ons te help. Ons grootste behoefte is egter gebed. Ons is dankbaar vir al die morele en emosionele ondersteuning.

Die egpaar wil hê dat mense tuis moet weet dat hulle, ondanks die onsekerheid en finansiële druk, steeds op hul geloof staatmaak.

Die ervaring het Matthew ook anders laat dink oor reis tydens swangerskap.

“Ek sal nooit weer aanbeveel dat ’n swanger vrou reis nie. Die risiko is net te groot,” sê hy.

Vir nou bly hul fokus op Cleoné se gesondheid, hul seuntjie se ontwikkeling en die hoop dat hulle hom veilig huis toe sal kan bring wanneer die tyd reg is.

Hierdie is ‘n ontwikkelende storie en sal opgedateer word sodra nuwe inligting beskikbaar is.