Local News

Geliefde Jo-Lin só onthou na sy in botsing sterf

Ná die noodlottige motorbotsing by die Tom Naudé-brug deel Jo-Lin Scott se familie herinneringe aan haar groot hart, sterk geloof en liefde vir mense.

POLOKWANE – “Ek gaan my kind vreeslik mis. Sy was my vriendin, my bondgenoot en kameraad, veral met haar sussies. Ek wens hierdie vir geen ma toe nie, ‘n mens dink altyd hierdie kan nie met jou gebeur nie.”

Só vertel Linda Goosen, na die skielike dood van haar dogter, Jo-Lin Scott (22) in ‘n motorbotsing op 12 November by die Tom Naudé-brug.

Jo-Lin het haar laerskoolloopbaan by Pietersburg Laerskool voltooi waarna sy vir ‘n rukkie by Hoërskool Pietersburg was voordat sy haar skoolloopbaan met tuisonderig voltooi het.

Jo-Lin Scott word deur haar familie onthou vir haar omgeehart, sprankelende persoonlikheid en liefde vir mense.

‘n Groot liefde vir mense

Sy het na skool skoonheid studeer en was tot met haar dood werksaam by Halsted Polokwane.

“Jo-Lin was ‘n mens met ‘n warm persoonlikheid en iemand wat soveel omgee in haar gehad het. Sy was ‘n Godvresende vrou met ‘n ongelooflike goeie sin vir humor,” vertel Linda.

Jo-Lin was die oudste van drie susters en het haar ma ook gehelp met die versorging van die jongeres.

“Sy was passievol oor mense en diere, en wou altyd almal help, al beteken dit soms sy moet te kort kom. Haar sprankelende persoonlikheid het elke vertrek waarin sy stap, opgehelder.”

Linda sê eerlikheid en opregtheid was belangrike waardes vir Jo-Lin. Sy het met gemak drukkies en komplimente uitgedeel.

Slegs ‘n paar dae voor haar dood, het sy in haar dagboek ‘n plasing gemaak uit Johannes 13:7: ‘Wat Ek doen, begryp jy nou nie, maar jy sal dit hierna verstaan’ – ‘n boodskap waaraan haar geliefdes nou vashou.

Sy word reeds gemis

“Jo-Lin was nie net nog ‘n dogter of net nog ‘n sussie nie. Sy was my ondersteuning met die grootmaak van haar sussies. Sy het soveel omgee en liefde vir hulle gehad. Jo-Lin was altyd die hart van die vriendekring.”

Linda noem dat daar reeds alledaagse dinge is wat hulle mis van Jo-Lin.

“Haar teenwoordigheid, haar raad en beslis die liefde wat sy uitgestraal het.

“Ek wil hê mense moet onthou dat sy altyd probeer het om die wêreld ‘n beter plek te maak.

“Sy wou net hê daar moet vrede en liefde wees.”

Jo-Lin word oorleef deur haar ouers en twee susters. Daar sal ‘n privaat lewensviering per uitnodiging gehou word.

For more breaking news follow us on Facebook Twitter Instagram or join our WhatsApp group

At Caxton, every story is written by humans. We use AI only to perform quality checks - never to generate the news. Happy reading!

Support local journalism

Add The Citizen as a preferred source to see more from Review in Google News and Top Stories.

Maretha Swanepoel

My name is Maretha Swanepoel and I have worked at the Polokwane Review since 2012. The decision to become a journalist came at 04:00 one Friday morning while watching news of bombings in Afghanistan and I realised I wanted to be there. Some years later, I decided to rather stay in South Africa and join the industry due to my love for writing and curiosity. Even though I can write all beats, I love human interest and community news with some schools added to the mix. Telling someone’s story and using my camera to make memories is a privilege. My interests include animals (especially dogs) and mental health. I like to spend my time with my dogs and a good book. My family is important and takes second place in my heart. God is always first.

Related Articles

Back to top button