POLOKWANE – Dit was vier jaar gelede wat Juffrou Linda Coetzee en die gr.8-netbalspelers by Tom Naudé mekaar die eerste keer ontmoet het.

Gereed vir aksie het hulle begin oefen en kort daarna het Zandré van der Vyver by hulle aangesluit as afrigter. Deur die jare het die span gegroei en vandag is hulle ‘n gedrewe eerste span wat nie terugstaan vir enige uitdagings nie.

Die span het al vele suksesstories behaal, vertel sy.

“Hulle het reeds in 2021 aan die Topskoletoernooi deelgeneem waar hulle sesde in die land in hulle ouderdomsgroep geëindig het. Hulle het verlede jaar vyfde nasionaal geëindig. Een van ons spelers is ook in die SA-span opgeneem asook in die Fast Five span.”

Die span neem deel in die Capricorn Distrik liga, en het onlangs weer gekwalifiseer vir die Limpopo kampioenskappe waar hulle tweede plek in die topskoletoernooi gekry het.

Van der Vyver is tans die hoofafrigter terwyl Coetzee nou in ‘n ondersteunende rol betrokke is.

Aangesien daar drie gr. 12-meisies in die span is, is oefentyd redelik beperk. As span oefen hulle drie keer per week, maar die spelers word ook aangemoedig om elke dag op hulle eie te oefen. Hul het n fiksheidsroetine wat hulle daagliks moet voltooi om hulle fiksheid op standaard te hou.

“Ons besef akademie moet eerste kom, voor netbal,” sê sy.

Die afrigters stel jaarliks vir hulleself en die span sekere doelwitte.

“Ons het kort- en langtermyndoelwitte. Elke speler bepaal saam met die afrigter ook individuele doelwitte vir haarself. Die dryfkrag van die span word beslis beïnvloed as die span se doelwitte behaal word. Ons vier dit ook saam met elke speler indien sy nie haar persoonlike doelwit bereik het. Elke mens wil tog voel dat sy iets in die lewe bereik het wat jou meer positief beïnvloed as enige iets anders. Opgee is nie vir hierdie span ‘n opsie nie.”

Wanneer Coetzee nie voor haar Engelsklas staan of met ‘n fluitjie op die netbalbaan nie, sou sy graag ‘n toergids wou wees.

“Ek verken graag daardie ongerepte juwele van ons eie land, en sal graag met ander wou deel. Om ‘n land te kan beleef op ‘n ander manier is ongelooflik. Om slap chips te eet, toegedraai in koerantpapier, op ‘n sypaadjie voor die beste plaaslike Kaapse kafeetjie is vir my baie meer spesiaal as om in viersterrestaurant aan te sit vir ‘n driegangmaaltyd.”

Lees meer oor Linda se Engelse klas in Polokwane Review.