Gr. 7-Reffies groet die skool in styl
Akademie Reformia se gr.7 klas en hulle ouers het afskeid gehou by The Duchess Tea Garden waar die gr. 6-klas hulle verwelkom het en as kelners opgetree het.
POLOKWANE – Om totsiens te sê is nie altyd maklik en lekker nie, veral as jy nie weet wanneer jy die ander persoon weer gaan sien nie.
By Akademie Reformia is die klasse klein, met die gevolg dat almal in die graad vriende is. En omdat die skool slegs ‘n laerskool is, weet die leerders in gr. 7 dat hulle volgende jaar nie weer langs hulle beste maat in die klas gaan kan sit nie.
Dus het die skool besluit om vir dié klas van sewe ‘n gemaskerde afskeid te gee.
Saterdagmiddag, kort voor sononder, het die leerders en hulle ouers by The Duchess Tea Garden bymekaar gekom, waar die gr. 6-klas hulle verwelkom het en as kelners opgetree het.
Die enigste seun in die klas, Christiaan van Tonder, het vir elke meisie ‘n roos gebring terwyl elke gas die aand agter ‘n masker kon deurbring.
