POLOKWANE – Ekonomie is meer as net ‘n skoolvak – dit help jongmense om die wêreld rondom hulle beter te verstaan.

By Hoërskool Pietersburg word hierdie beginsel deeglik toegepas, en die uitslae spreek vanself.

As een van Suid-Afrika se Top 20 skole in ekonomie, het PHS ’n bewese suksesformule.

Wilna Potgieter, ekonomie-onderwyser, deel haar wenresep vir sukses, wat insluit ’n sterk grondslag, werklike toepassings, kritiese denke en spanwerk.

“Ekonomie as skoolvak behels vraag en aanbod. Dit ondersoek die gedrag van mense, verduidelik die gedrag van die regering en leer jou hoe om buitelandse valuta te verstaan. Dit sou egter baie sin maak indien ekonomie ‘n verpligte vak op skool kon word,” verduidelik sy.

Haar resep tot sukses in ekonomie is gebaseer op die volgende stappe:

1. ‘n Duidelike begrip van basiese konsepte: “Begin met die bou van ‘n sterk grondslag van die basiese ekonomiese konsepte, soos vraag en aanbod, koste, wins, en markstrukture. Dit help leerders om later meer komplekse temas te verstaan.”
2. Verbinding tussen teorie en werklike lewenservaring: “Ekonomiese konsepte kan dikwels abstrak wees, so dit is belangrik om dit te verbind met werklike lewensvoorbeelde. Dit kan help om die belangrikheid van ekonomie in die alledaagse lewe te illustreer en leerders meer betrokke te kry.”
3. Deurlopende oefening en herhaling: “Ekonomie is ‘n vak wat dikwels verwarrend kan wees. Deur gereeld oefeninge en vrae te doen, kan leerders ‘n dieper begrip van die stof ontwikkel. Herhaling is die sleutel om die inligting te internaliseer.”
4. Stimuleer kritiese denke: “Ekonomie handel nie net oor die memorisering van feite nie, maar ook oor die ontwikkeling van kritiese denke. Leerders moet leer om analities na die wêreld om hulle te kyk en vrae te vra oor hoe ekonomiese keuses geneem word.”
5. Werk as ‘n span: “Ekonomie is dikwels ‘n vak wat samewerking vereis. Oefeninge, projekte en debat kan ‘n positiewe invloed hê op die ontwikkeling van begrip, aangesien leerders verskillende perspektiewe kan inbring.”
6. Duidelike en eenvoudige kommunikasie: “Dit is belangrik om die inhoud eenvoudig, maar duidelik, aan leerders oor te dra. Die gebruik van visuele hulpmiddels, grafieke en ander leermiddels kan ook help om die konsepte makliker verstaanbaar te maak.”
7. Motivering en doelwitte: “Dit is belangrik om leerders gemotiveer en gefokus op die groter prentjie te hou. As leerders verstaan hoekom hulle die vak moet leer en hoe dit in die werklike wêreld toegepas kan word, sal hulle meer entoesiasties wees om te leer.”