POLOKWANE – Op die ouderdom van drie word Roedie Roets (27) aan stoei as sportvorm blootgestel en bykans onmiddellik word ‘n lewenslange liefdesband gevorm.

Teen 13 is die band reeds gevestig en kan dié talent, wat later gevegskuns sou insluit, nie verder weggesteek word nie.

Vandag spog hy met die titel van interim veergewigkampioen in gemengde gevegskuns en sy bynaam is nie verniet Relentless nie, want Roedie is genadeloos wanneer sy voete die gevegsmat raak.

Roedie was ook Span Shevchenko se hoofafrigter, Valentina Schevchenko, se eerste keuse vir die Ultimate Fighting Championship: Team Grasso vs. Team Shevchenko wat in Augustus in Las Vegas plaasgevind het.

Sou Roedie in Las Vegas tydens die UFC se The Ultimate Fighter geveg gewen het, sou hy ‘n goeie kans gestaan het om ‘n kontrak by hulle los te slaan.

“My eerste geveg in Las Vegas in Augustus was teen ‘n Meksikaan, Guillermo Torres wat ek gewen het. Die tweede ronde was teen Kaan Ofli, ‘n Australiër. Hier het ek egter verloor. Dana White, HUB van die UFC, waar Dricus du Plessis veg, was baie beïndruk met my Olimpiese standaard stoei en het gesê ek het ‘n blink toekoms wat voorlê, moontlik saam met die UFC.”

Sy mees onlangse geveg was op 10 Oktober toe hy teen Ayanda ‘The Power’ Zwane te staan gekom het in die EFC Extreme Fighting Championship Africa in Sandton.

“Die feit dat dit geveg van die aand was, is ‘n bonus. Ons het vyf rondes gehad wat elk vyf minute geduur het, en ek het al vyf gewen.”

Roedie sê voorbereiding is baie belangrik, liggaamlik en geestelik. Hy oefen saam met Igeu Kabesa, sy mede-afrigter by die Ion Baciu Stoei Gimnasium as deel van sy voorbereiding.

Kabesa, wat self ook afrigter is en kompeterend veg, het in Julie aan die Extreme Fighting Championship 115 in Sandton deelgeneem. Hy het teen Humphrey ‘King Cobra’ Mulenga geveg en gewen.

“‘n Mens kan baie seerkry as jou voorbereiding nie op standaard is nie. Jy moet lewe vir die sport en ongelooflik baie oefen.”

Beide ek en Igeu is gereed vir vele gevegte en om aan die Olimpiese Spele deel te neem.”

Roedie rig ook stoeiers af en dit gee vir hom struktuur.

Hy en sy ewe bekende pa, Jan, die eienaar van Ion Baciu Stoei Akademie, glo om voornemende stoeiers ‘n maand kans te gee om te besluit of hulle regtig van stoei hou voordat hulle by die klub inskryf. Kabesa rig saam met die Roetse af.

Die span rig ook stoei af by Pietersburg Laerskool en Curro Heuwelkruin af.

Roedie spog met 32 Suid-Afrikaanse titels in beide vry- en Grieks Romeinse style.

“Ek droom daarvan om ‘n UFC wêreldkampioen te word, soos Dricus, in sy voetspore te volg en Suid-Afrika en Polokwane trots maak. Verder wil ek ook my pa trots maak wat reeds ‘n Olimpiese kampioen opgelewer het asook wêreldkwaliteit stoeiers. Later, wanneer ek UFC-kampioen is, wil ek meer fokus op die afrigting met die oog om vir meer mense hierdie geleentheid te gee om as trotse stoeiers die wêreld in te gaan,” sluit hy af.