MOKOPANE – Laerskool Krugerpark se swemspan het ‘n tweede plek verower tydens die Top 8 skolegala wat verlede naweek in Tzaneen gehou is.

Altesaam 391 swemmers van onder meer Laerskool Bosveld, Julian Muller, Krugerpark, Phalaborwa, Tzaneen, Pietersburg-Oos en Unicorn Preparatory School het deelgeneem.

Na afloop van die dag het die Krugiemeisie-span met 781 punte op die telbord gestaan terwyl die seuns spog met ‘n puntetelling van 804 punte.

Die Krugies se gesamentlike puntetelling van 1 585 het gesorg dat hulle die tweede plek inneem, na Laerskool Tzaneen wat wen met 1 694 punte. Laerskool Phalaborwa eindig derde met 1 497 punte.

Die Krugies se medaljesak het behoorlik gebult na die gala.

Emma-lee Claassen is aangewys as die junior Victrix Ludorum, en swem ‘n nuwe tyd van 03:18 los in die o/10 meisies 200m wisselslag.

Jaimee Smit, die swemorganiseerder het almal bedank vir hulle bydrae tot ‘n suksesvolle swemjaar.

“Ek kan nie glo die swemseisoen vir 2024 het tot ‘n einde gekom nie. Dit was regtig een vir die boeke. Baie dankie aan elke swemmer vir hulle harde werk en deursettingsvermoë. Julle het ons almal so trots gemaak. Baie dankie Awie Hattingh vir jou omgee en harde werk met die kinders. Ons kinders leer soveel by jou elke jaar, ons is dankbaar om jou as afrigter te hê. Aan Karen Coetzee en Cheraye Engelbrecht wat my regterhande is by die skool, baie dankie vir julle hulp om swem by die skool die lekkerste sport te maak. Annatjie de Kock, baie dankie dat jy ons kinders ondersteun en deel is van ons span. Ouers, sonder julle is die nie moontlik nie, baie dankie vir julle geduld en ondersteuning. Die op en af ry, die werk as beamptes as ek vra. Dis so lekker om te weet ons het julle ondersteuning. Dankie vir almal wat geborg en bydrae gelewer het. Dankie vir alles wat agter die skerms gebeur om ons span so suksesvol te maak. Ons gaan julle gr. 7-groep mis volgende jaar. Baie, baie dankie vir ‘n uitstekende 2024.”