POLOKWANE – Honderde boogskietskuts en hulle families het verlede week die stad besoek vir die Africa Genesis Archery (AGA) se nasionale toernooi, wat oor vier dae by die Polokwane Karee Militêre Basis gehou is.

Volgens AGA se hoofuitvoerendebeampte, Wilhelm Greeff, neem interprovinsiale spanne op die eerste dag deel, terwyl volwasse skuts op die tweede dag teen mekaar meeding.

Die laaste twee dae is gereserveer vir klubs en skole.

“Tydens die interprovinsiale kampioenskappe skiet skuts net na die teiken se middelpunt, terwyl die ander skuts ook 3D-diere van rubber kan skiet,” het Greeff verduidelik.

Daar is tans nie ‘n boogskiettklub in Polokwane nie, maar Hilda van der Schyff, ma van jong skut Isak, beoog om vroeg in 2026 ‘n klub vir die stad se inwoners te begin.

“Ek is nog op soek na geskikte grond of ‘n area waar ons kan oefen,” sê sy.

Greeff beklemtoon dat boogskiet ‘n familiegesinde sport is.

“Kinders, selfs baie jonges en dié in rolstoele, kan deelneem. Die sport help kinders fisies en geestelik en leer hulle dissipline. Ons het al kinders wat met aandagafleibaarheid gediagnoseer is, kinders wat nie kan loop nie, en outistiese kinders gehad wat die sport geniet het. Boogskiet bied geleenthede aan kinders wat nie aan ander sportsoorte kan deelneem nie, en ook vir leerders wat tuisonderrig ontvang of in klein skole is waar daar nie genoeg leerders vir spansport is nie.”

Skuts kan deelneem op plaaslike, provinsiale en nasionale vlak, en die sport bied volgens Greeff ‘n unieke kans vir gesinne en jong talent om saam te groei en vaardighede te ontwikkel.

Om deel te word van die plaaslike boogskiekklub, praat met Hilda by hildavds.hvds@gmail.com.