Jong gholfspeler uit Polokwane wys sy talent op die baan
Toewyding op die gholfbaan en ‘n kalm benadering onder druk het tot ‘n sterk prestasie by ‘n nasionale toernooi gelei.
POLOKWANE – Ouers droom dikwels daarvan dat hul kinders in hul voetspore sal volg en stel hulle van jongs af aan hul belangstellings bloot.
Vroeë blootstelling aan gholf
Só het Zjuan Muller reeds op ‘n jong ouderdom kennis gemaak met gholf. Hy onthou dat hy reeds in 2014 sy eerste gholfstel gekry het, maar eers in 2022 ernstig begin speel het nadat hy sy eerste gholfles bygewoon het.
“My pa en oupa speel ook gholf, al speel hulle nie so goed soos ek nie,” skerts hy. “Toe my pa my vra of ek belangstel, het ek ‘ja’ gesê. Sedertdien het ek al ses toernooie gewen.”
Deurbraak by SA Kindergholftoernooi
Zjuan het onlangs aan die SA Kindergholftoernooi by die Kameeldoring Gholfklub in Mokopane deelgeneem, waar hy die eerste plek in sy ouderdomsgroep behaal het met ‘n telling van 74.
“Ek het baie hard gewerk en is bly dat ek so goed gevaar het. Dit is lekker om die resultate van my harde werk te sien.
“My langspel met die drywer het beslis die beste vir my gewerk tydens die kompetisie. Alles het net reg uitgewerk daardie dag,” sê hy.
Hoogtepunt op die 18de putjie
Een van die hoogtepunte van sy rondte was op die 18de putjie, waar hy ‘n arend aangeteken het. “Dit beteken ek het die putjie in twee houe minder as baansyfer voltooi,” verduidelik hy.
Zjuan sê hy probeer die uitdagings van die sport hanteer soos dit opduik. Wanneer hy ‘n swak hou speel en negatief begin voel, herinner hy homself daaraan om nie daarop vas te kyk nie, maar eerder op die volgende hou te fokus.
“Ek gaan gereeld gholfbaan toe om te oefen, maar in my voorbereiding vir hierdie toernooi was dit die belangrikste om my kop reg te kry sodat ek gefokus en positief kon bly. My ouers ondersteun my baie in my gholfreis.
“Hierdie oorwinning beteken baie vir my, want dit wys dat harde werk my spel verbeter.”
Doelwitte vir die seisoen
Vir die res van die seisoen is sy doelwitte om sy voorgee te verbeter en aan die einde van die jaar vir die Limpopo IPT-juniorspan gekies te word.
“Die grootste les wat ek uit hierdie toernooi geleer het, is om kalm te bly en nie negatief te raak wanneer ek ‘n slegte hou speel nie,” sê hy.
