POLOKWANE – Die 14-jarige gholfspeler Nathan Faver het reeds op ’n jong ouderdom geleer dat sukses harde werk verg.

En deesdae bestee hy elke dag sowat vier ure aan sy gholf om sy spel en voorgee te verbeter.

Sy harde werk het uiteindelik vrugte afgewerp toe hy op 22 Augustus aan die Limpopo Golf Union Champ of Champs streeksfinale, aangebied deur die Thabazimbi Gholfklub, deelgeneem het en as die wenner van die mans C-divisie aangewys is.

Dit was nogal ’n moeilike dag. Die baan was hard en dit was ongelooflik warm in Thabazimbi. Dit was ook die eerste keer dat ek op dié baan gespeel het, so dit was maar vreemd.

Nathan gaan Limpopo, saam met baljoggie, Sakia Makhafola, by die RSA Champion of Champions-nasionale eindronde verteenwoordig. Die kompetisie vind van 20 tot 23 September by die Vaal de Grace-gholflandgoed in die Vrystaat plaas. Makhafola het intussen ook die joggie-divisie gewen.

Die Thabazimbi-baan is ’n negeputjie-baan met alternatiewe afslaanplekke vir ’n uitdagende 18-putjie-opsie. Nathan sê hy het ná die eerste nege putjies ’n agterstand gehad en dus nie verwag om as wenner aangewys te word nie.

Ek was redelik gespanne voor ek begin speel het, maar ná die eerste hou fokus ek op die spel en vergeet ek van die stres. Ek het nie regtig verwag om die Limpopo Golf Union Champ of Champs streekfinaal te wen nie, maar ek het my beste gegee.

Die oorwinning het Nathan se motivering verder aangevuur.

Hy het reeds in gr. 6 in Oosskool ernstig begin gholf speel en sê die sport is nou vir hom ongelooflik lekker. Hy presteer goed onder druk en leef volgens die leuse: ‘Dit is nie klaar totdat dit klaar is nie’.

My doelwit is om onder die top vyf spelers te wees en ek werk aan my kortspel, wat die sethoue en kaphoue insluit.