Onverwagse storm veroorsaak groot skade

Polokwane was gistermiddag (Woensdag) in chaos gedompel toe ‘n onverwagse swaar reënbui en hael gepaard met stormwind uitgesak het.
Strate het op verskeie plekke verspoel, motors het onklaar geraak, paaie is beskadig, bome het omgeval en byna die hele stad en omliggende hoewes was tydelik sonder elektrisiteit. Botsings regoor die stad het verkeersopeenhopings veroorsaak. Swaar donderweer het blykbaar ook ‘n meenthuis op ‘n hoewe op Palmietfontein getref waarna dit aan die brand geslaan het, maar die inligting kon nie bevestig word nie.
Die sterk vloei van die Sterkloopspruit het veroorsaak dat dit in President Krugerstraat oor die pad gespoel het en ‘n verkeersbeampte het die straat blokkeer om te verhoed dat motoriste dié laagwaterbrug probeer oorsteek.

‘n Bron in die nooddienste het gesê ten spyte van die baie ligte botsings is daar geen ernstige voorvalle aangemeld nie. Polokwane polisie se kommunikasiehoof, Ntobeng Phala, kon nie bevestig of daar enige ernstige voorvalle na die reën aangemeld is nie.

Storie: RC Myburgh
>>rc.observer@gmail.com

Hooffoto: Motoriste moes by die laagwaterbrug in President Krugerstraat omdraai nadat die Sterkloopspruit die pad verspoel het.  (Foto: RC Myburgh)