Secunda-man se been val gate in weens spinnekopbyt
[Grafiese inhoud] Man is dankbaar dat sy been daagliks verbeter
BETHAL – Mnr. Dirk Smith se been het gate in geval nadat hy in Oktober tydens ‘n gesinsvakansie by De Voetpadkloof anderkant Middelburg deur ‘n spinnekop gebyt is.
“Daar was net ‘n rooi knoppie op my been en ek het eers gedink dit is ‘n muskietbyt,” het mnr. Smith vertel.
Dié knoppie het egter later ‘n klein gaatjie gevorm en mnr. Smith is dokter toe.
Die dokter het vermoed dit is ‘n spinnekopbyt en het dit behandel, maar mnr. Smith het egter later infeksie in die wond gekry en is na ‘n internis in eMalahleni (Witbank) verwys.
Dié internis het hom na ‘n chirurg verwys wat die wonde, wat toe reeds septies was, in teater skoongemaak het.
Mnr. Smith se een spinnekopbyt het hom met 17 gate in sy been gelaat.
Hy is sedert Oktober met siekverlof en kan eers weer na sy werk terugkeer as sy been beter lyk.
“Ek het op ‘n kol gedink ek gaan my been verloor, maar ek smeer daagliks heuningsalf op en die wonde lyk nou baie beter.”
