Die naweek van 30 April tot 2 Mei het Misty Waters, die jaarlikse musiekfees, hom weer afgespeel by die Kamp Oase feesgrond.

Misty Waters het in 2017 by Lake Umuzi Waterfront ontstaan met slegs ’n handjievol feesgangers.

Dié fees het egter vinnig ontpop as ’n gewilde samekoms vir oud en jonk, en volgende jaar word daar 10 jaar van musiek en nuwe vriendskappe gevier.

Misty Waters word oor ’n langnaweek gehou wat gewoonlik drie dae van musiek is en besoekers die laaste dag kan gebruik om na hul tuistes terug te keer.

Volgende jaar met die 10 jaar-feesviering val dit oor vier dae vanaf 23 tot 26 April.

Bekende en gewilde sangers is jaarliks op die hoofverhoog en mense vanoor Suid-Afrika sorg dat hulle betyds hul beplanning doen en verblyf bespreek.

Omdat die feesgrond by die kampterrein van Kamp Oase is, word hierdie gebied ’n groot feesterein waar die vure hoog brand en nuwe vriende gemaak word.

Vanjaar het die Umuzi Teater blues-musiek aangebied tot voorloop van die laatmiddaggebeure op die hoofverhoog.

Volgens die organiseerders, was dít ’n reuse sukses en die feesgangers en kunstenaars kon nie uitgepraat raak oor die besonderse goeie klank en prag van die teater nie.

So het die feesorganiseerders gewys dat musiekfeeste nie net in die buitelug hoort nie.

Die verskeidenheid van kosstalletjies het vir ’n wye spyskaart gesorg en verseker dat selfs die kieskeurigste eter aan die eetgoed gesmul het.

Besoek die webwerf www.mistywaters.co.za of stuur ’n Whatsapp na 017 2003 303 vir verdere navrae.