Die Volkskool Bethal het onlangs ’n landbou-afdeling begin. Dié afdeling is in Augustus verlede jaar amptelik gevier toe Basjan Venter, voorsitter van die skoolraad die gedenkplaat onthul het.

Die Volkskool Bethal se hoof, Faan Beeslaar, het gesê voedselsekerheid is die grootste uitdaging vir die toekoms.

“Ons is deeglik bewus daarvan dat ons van die gemeenskap afhanklik is om dié studierigting te kan implimenteer,” het Beeslaar gesê.

Sommige praktiese fasette van dié nuwe afdeling kan op die skoolterrein gedoen word terwyl ander instansies en boere by die proses betrek word vir ander fasette.

Volgens Beeslaar is die Volkskool Bethal gegrond op Christelike volkseie beginsels en is deel van die gemeenskap se strewe na behoud van identiteit.

“Danksy bereidwillige medewerkers kon ons nie net geld vir die skool genereer nie, maar ook ’n derde van die wins aan Helpend Hand skenk.

“Die opbrengs van die landbouprojek word juis aangewend om die skool in ’n posisie te stel om deurentyd uitstekende akademiese standaarde te handhaaf.”

LEES OOK: AfriForum Buurtwagspan hou Secunda skoon

LEES OOK: Radio-omroeper van Secunda gekies as Mevrou Suid-Afrika finalis