Laerskool Florida se Florriefees was vanjaar groter as ooit.

Die fees het Saterdag, 30 Augustus, sy hoogtepunt bereik met ’n heerlike uitspat-pretdag, wat onder andere ’n wye verskeidenheid stalletjies en ’n reuse-springkasteel ingesluit het.

Daar was genoeg om te doen vir oud en jonk, en die sportgronde by Hoërskool Florida was van vroegoggend al in rep en roer. Die personeel van die indrukwekkende springkasteel kon nie vinnig genoeg die verrigtinge aan die gang kry vir die opgewonde kinders nie.

Oraloor het die Florries deelgeneem aan verskillende speletjies en aantreklikhede soos gesigverf, vissievang en vele meer, terwyl ouers en gemeenskapslede deur die menigte stalletjies gesoek het vir winskope en lekkernye.

Die Florriefees het vanjaar oor ’n hele week plaasgevind, met elke dag ’n ander gebeurtenis in die aanloop tot Saterdag se groot fees, onder andere ’n gek-sokkiedag, ’n kleurvolle bykomstighede-dag, ’n snaakse-hoed-dag en ’n lawwe-hare-dag.

Die skoolweek is afgesluit met entrepreneursdag, waarna die hele skool Saterdag heelhartig aan die Florriefees deelgeneem het.

Volgens die skool se skakelbeampte, Melissa Kruger, was die fees ’n reusesukses.

“Florries – en al die ander feesbesoekers – het hulle gate-uit geniet,” sê sy.