Oud word is nie vir sissies nie. Gelukkig is Hoërskool Florida nie net ’n geliefde instelling nie, maar steeds – 80 jaar later – een van die mees formidabele skole op die Wes-Rand.

Die skool het op Saterdag, 27 September, sy 80ste bestaansjaar in ware styl gevier met ’n massiewe “Van Toeka tot 80”-fees.

Toe die hekke om 14:00 oopmaak, het oudleerders, ouers, leerders en vriende van heinde en verre die sportvelde ingevaar. Ten spyte van weer wat soms na reën geneig het, is die groot mylpaal met oorgawe gevier.

By die feesmark is daar behoorlik sake gedoen, met uitstallers wat alles van tuisgebak en biltong tot klere, bykomstighede en ander unieke produkte te koop aangebied het.

Die First Discovery Scouts het, soos altyd, die jongklomp vermaak met ’n verskeidenheid aktiwiteite, terwyl die biertent groot aftrek geniet het – danksy die grootskerm-rugby en die gesellige vure met die reuk van hardehout in die lug.

Op die verhoog het die vermaaklikheidsprogram skares in hul honderde gelok. Die Penkoppe Boere Orkes het die verrigtinge afgeskop en die feestelike stemming met hul opgewekte tradisionele musiek behoorlik aangeblaas.

Suid-Afrika se eie “Michael Jackson”, Michael Jonathan, en sy span dansers en agtergrondsangers het die energievlakke laat styg met ’n vuurwarm vertoning van ou gunstelinge – kompleet met kenmerkende MJ-danspassies.

Die musiek is vir ’n rukkie onderbreek vir die Springbokke se wedstryd teen Argentinië, waarna DJ Austen die feesvieringe weer aan die gang gesit het.

Musieksterre Loufi en Droomsindroom het die aand afgesluit met energieke optredes wat die viering op ’n hoogtepunt laat eindig het.