Aantygings van rassisme by Laerskool Dr Havinga word steeds ondersoek, ondanks die feit dat die Gautengse Onderwysdepartement reeds weke gelede aangedui het dat die ondersoek teen twee onderwysers en die skoolhoof in ’n “gevorderde stadium” was.

Volgens ’n nuwe verklaring deur departementele woordvoerder Steve Mabona, in reaksie op vrae van die Roodepoort Record, bly die saak onderhewig aan die sub judice-reël. Dit beteken dat die departement geen verdere kommentaar sal lewer totdat die ondersoek afgehandel is nie.

• Lees ook: Havies rassisme: Ondersoek in gevorderde stadium

Die departement het ook geweier om enige besonderhede oor die tydlyn te gee, ten spyte daarvan dat die ondersoek oorspronklik binne 90 dae afgehandel moes wees.

Intussen het die Record verneem dat ’n groep van sowat 12 ouers van graad sewe-leerders by die Roodepoort-landdroshof aansoek gedoen het vir beskermingsbevele teen ’n leerder of leerders by die skool wat glo ander kinders – veral wit kinders – boelie en intimideer.

Mabona het bevestig dat die departement bewus is van die aansoeke.

“Ons benadruk dat die departement enige aantygings van rassisme in ’n ernstige lig sien en ’n nulverdraagsaamheidsbeleid in hierdie verband volg. Ons sal dus nooit huiwer om op te tree in so ’n situasie nie,” het Mabona gesê.

• Lees ook: ‘Dis bog,’ sê ouers oor beweerde rassisme by Laerskool Dr Havinga

Die Record het intussen vertroulik verneem dat die skool dissiplinêre verhore teen sekere leerders voortgaan. Hierdie proses word glo deur die skool se regsverteenwoordigers gemonitor.

• Lees die oorspronklike artikel hier: Bewerings van rassisme by Havies ondersoek

Bronne het verder beweer dat die twee onderwysers en die skoolhoof wat van rassisme beskuldig word, steeds nie amptelik van enige oortreding aangekla is nie.

“Ons kinders het reeds ’n moeilike jaar agter die rug,” sê een ontstoke ouer. “Ons vind die departement se hantering van hierdie saak uiters onprofessioneel en minagtend teenoor ouers en leerders van die skool.”