So staan 2018 ook einde se kant toe, en al wat ek kan sê is, “Sjoe, wat ‘n jaar was dit nie!”

Dit was lank en uitputtend met vele uitdagings, vreugdes maar ook hartseer. Ek is net verlig dat ons heelhuids anderkant uitgekom het.

My wens vir hierdie Kerstydperk is om my voet van die versneller af te haal en rustig te raak; om tyd saam met my man en dogters te spandeer, en op hoogte te kom van wat in elkeen se lewens aangaan sodat ek weereens die belangrikheid van gesin en familie kan besef.

Ek gaan definitief hierdie Kers- en vakansieseisoen gebruik om nuwe tradisies te begin en baie herinneringe te skep.

Ek bedank hiermee graag al die Record se lojale lesers vir hul ondersteuning deur die jaar. Mag elkeen van julle ‘n geseënde Kersfees geniet en mag 2019 gevul wees met vreugde, geluk en seën.