In slegs hul tweede bestaansjaar het Laerskool Florida se meisieskrieketspan tot bo aan die Gauteng-Wes Groep A-ranglys beweeg deur die heersende kampioene, Laerskool Kenmare, te onttroon.

Verlede jaar het hulle amper die paal gehaal, maar in die finaal teen Kennies, wat wyd bekend is vir hul sportvernuf, verloor.

Volgens organiseerder en afrigter, Dala Greyling, het die skool verlede jaar vir die eerste keer meisieskrieket aangebied, met 20 dogters van graad 4–7 wat deelgeneem het.

“Florrie-meisies het die kans met albei hande gegryp en met harde werk en deursettingsvermoë fantastiese vordering gemaak,” sê sy.

“Tot so ‘n mate dat ons tot die finaal deurgedring het. Kennies was net eenvoudig te sterk, maar dit het ons net aangespoor om ons aanslag hierdie jaar te versterk.”

Groep A-skole sluit Kenmare, Monument Primary School, Helderkruin, Dr Havinga en Millennium in. Groep B bestaan uit Fairland, Rapportryer, Fontainebleau, Kid Maponya (Kagiso), Randfontein, West Gold Primary en Muldersdrif.

Dala sê die meisies se toewyding en vasberadenheid was merkwaardig:

“Hulle het so hard gewerk. Ek bars van trots om te sien hoeveel vordering hulle in so ‘n kort tydjie gemaak het.”

Die span se harde werk het ook die aandag van plaaslike besighede getrek.

Warrior Paints Ruimsig het vir die span ‘n vrag kriekettoerusting geskenk, insluitend kolwe, balle en beenskutte, terwyl ander besighede uniforms en sportsakke geborg het.

“Ons meisies kan nou met trots in hul pragtige uniforms die veld betree,” sê Dala.

“Die volgende stap is die wedstryd teen die Groep B-wenners. Hulle is nog besig met hul liga, dus sal ons eers later weet teen wie ons te staan gaan kom.”