Die Witpoortjie Rolbalklub het op Saterdag, 31 Januarie, hul finale fondsinsameling ten bate van drie siggestremde spelers gehou om hul deelname aan die Suid-Afrikaanse Nasionale Kampioenskappe vir Gestremde Rolbalspelers moontlik te maak.

Hierdie fondsinsameling het die vorm aangeneem van ’n splinternuwe rolbalkompetisie, genaamd die Bacon and Bias Cup, wat tussen verskeie klubs onder die vaandel van die Sables Rolbalassosiasie gespeel is. Die deelnemende klubs sluit Discovery, Florida-Noord, Leases, Honeydew, Krugersdorp, Maraisburg, Noordheuwel, Randfontein en Rustenburg in.

Volgens die klub se tesourier, Tommy Smith, is die kompetisie se naam aan die pryse wat op die spel was, te danke.

Die eerste prys was twee varke, en die tweede prys ’n varkmandjie; albei geborg deur Pick n Pay.

“Die dag is ruim ondersteun deur al die klubs van die Sables-distrik en daar is rolbal van uitstaande gehalte gespeel. Die beste van alles is dat ons met hierdie dag ons doelwit bereik het en genoeg fondse ingesamel het om ons spelers se deelname aan die Suid-Afrikaanse Kampioenskappe te verseker,” het hy gesê.

Die betrokke spelers is die huidige wêreldkampioen en twintigmalige Suid-Afrikaanse kampioen, Tracey Smith, asook Reg Smal en Salome Morries. Met hul deelname aan die Disability Nationals nou verseker, is die verwagtinge vir die trio besonder hoog.

“Hulle is die enigste siggestremde rolbalspelers in die Sables-distrik,” het Tommy beklemtoon.

“Boonop word hulle as van die top siggestremde spelers in die land beskou. Ons twyfel nie daaraan dat hulle ons distrik en klub baie trots gaan maak nie.”