Brakpan Rugbyklub het Saterdag uitstekende vertonings gelewer toe twee van sy spanne hul plekke in die Peregrine-ligafinaal bespreek het.

Die eerste span het Nigel in die halfeindstryd met 45-25 geklop, terwyl die o21-span Springs oortuigend met 53-0 verslaan het om ook deur te dring na die eindstryd.

Christopher Swart (slot) is as die eerste span se speler van die wedstryd aangewys, terwyl Milo Hattingh (flank) die o21-span se speler van die wedstryd was.

Die klub se tweede span het reeds vroeër vir die finaal gekwalifiseer.

Al drie Brakpan-spanne sal nou op 15 Augustus op Bosman Stadion in die Peregrine-ligafinale in aksie wees.

Brakpan se eerste- en o21-span speel teen Vereeniging, terwyl die tweede span Springs die stryd sal aansê.

Klubvoorsitter Frikkie Bosman het die gemeenskap aangemoedig om die spanne in groot getalle te gaan ondersteun.

“Ons het hard gewerk om die finaal te bereik en ons hoop op ‘n volgepakte stadion,” het hy gesê.

Bosman het bygevoeg dat die ondersteuning van die tuisskare ‘n groot verskil kan maak.

Hy hoop rugbyliefhebbers sal die datum afmerk en Bosman-stadion vul om die Brakpan-spanne aan te spoor.

LEES OOK: Just Wheels puts bakkies in the spotlight

LEES OOK: Canadian and Northern Irish racing stars to compete at Rock Raceway