Die vroulike geslag het hierdie jaar die Losberg Gymnastics-gimnastiekklub se naam tydens hul nasionale kompetisie hoog gehou.

Volgens die klub se eienaar en hoof afrigter, JJ Strydom, het drie meisies – Tlotlang Mokhahle, Caylee Menezes en Charmaine Joubert – onlangs by die National Training Centre in Pretoria deelgeneem.

Tlotlang het ‘n vierde plek op die balanseerbalk ingepalm.

“Dit was regtig ‘n groot kompetisie. Gimnaste van die Wes-Kaap, Noord-Kaap, Vrystaat, Mpumalanga, Limpopo, KwaZulu-Natal, die Oos-Kaap en Gauteng het deelgeneem. Ons is regtig baie tevrede met die meisies se uitslae en hoe goed hulle presteer het,” sê Strydom.

Hy voeg by dat Tlotlang en Charmaine in graad sewe is en volgende jaar na skole buite die Merafong-omgewing gaan.