Hoërskool Ermelo se leerders het op 5 Februarie hul dasse, baadjies, rokke en hoëhakskoene nadergetrek vir die jaarlikse Valentynsbal.

Dit is oudergewoonte in die skoolsaal gehou.

Die leerders het voor die dans vergader waar hul peuselhappies en skemerkelkies geniet het, terwyl hulle gesellig verkeer het met die musiekpersoneel wat vir agtergrondmusiek gesorg het.

’n Paar amateur-fotograwe het die fraaie paartjies en vriendekringe op kiekies vasgevang.

Die leerders het heerlik gedans en vir die honger mae was daar smullekker Debonairs-pizza’s te ete.

Mnr. Pieter Grobler, Hoërskool Ermelo se hoof, het gesê: “’n Opregte woord van dank aan elkeen vir hul tyd en moeite om jaarliks van dié Valentynsbal ’n spesiale geleentheid te maak.

“Jul harde werk gaan nie ongesiens verby nie en Hoërskool Ermelo is bevoorreg om personeel te hê vir wie dit ’n vreugde is om die belange van ons leerders eerste te stel.”