Die Hoëvelder het onlangs met verskeie matriekleerders van Ligbron Akademie vir Tegnologie gesels oor hoe die inperking hul laaste jaar van skool beïnvloed.

Daar heers ’n gemengde gevoel oor die inperking onder leerders.

Meeste van hul is frusteerd om gedurende die belangrikste skooljaar van hul lewens by die huis te wees, maar met die hulp van Ligbron se aanlynklasse, voel die leerders egter meer gerus.

Jané Bosman, leerder van Libron het gesê: “Ek mis my vriende en kon nie deel wees van hul 18de verjaardae nie, en die hele ervaring laat my onseker en angstig voel.”

Sy het bygevoeg dat dit wat sy in die nuus hoor en sien vir haar baie ontstellend is.

Die leerders se dae is met aanlynklasse, stokperdjies, familietyd en voorbereiding vir die matriekeksamen wat voorlê, gevul.

Op die vraag oor wat hulle gevoel is rondom die matriekeksamen wat voorlê, het die leerders geantwoord:

Hardu Prinsloo: “Ek is baie op my gemak oor die matriekeksamen wat voorlê, en Ligbron gee ons werklik die beste kans om ons doelwtte vir die eksamen te bereik.”

Megan Jones het gesê: “Ek is bang maar wel positief, die aanlynklasse help baie met die voorbereiding.”

Hannah Peer het gesê: “Ek is senuweagtig, maar ek het vertroue dat God asook my onderwysers en my toewyding en hardewerk, my vir dit wat voorlê sal, voorberei.”

Lelanie Davel het geantwoord: “Ek is nogal benoud en onseker, maar ek weet dat ek die enigste een is wat my toekoms kan bepaal en deur my akademie op datum te hou en my vertroue in God te stel, weet ek dat ek die matriekeksamen kan aanpak.”

Hoewel meeste van die leerders onseker is oor wat die inperking nog gaan inhou, voel hulle dat Ligbron se onderwysers die ekstra myl stap om hulle voor te berei op die matriekeksamen.