ERMELO – Die Suid-Afrikaanse Polisiediens (SAPD) het bevestig dat ’n interne ondersoek ingestel is nadat ’n sosialemedia-video onder hul aandag gebring is waarin ’n polisielid van Ermelo Polisiestasie glo teen 180 km/h bestuur.

Die video is glo deur die lid op ’n persoonlike Facebook-profiel gedeel as deel van plasings oor diensaktiwiteite tydens die onlangse langnaweek.

Volgens ’n inwoner het sy kommentaar op die plasing gelewer waarna sy geblok is.

Indien jy nie die video kan sien nie, kan jy dit ook op ons YouTube-kanaal kyk. Klik HIER

Die inwoner het later die afgelaaide video op haar eie sosiale-mediablad gedeel en SAPD-strukture daarin getag.

Kol. Mavela Masondo, provinsiale SAPD-woordvoerder, het ontvangs van Hoëvelder se navrae bevestig, maar nog nie kommentaar oor die inhoud van die video gelewer nie.

Hoëvelder sal sy reaksie in ’n opvolgberig publiseer sodra dit ontvang word.