Met ‘n draagbare radio ingestel op Radio Sonder Grense (RSG) volg ‘n gesin, wat tydelik langs die Kroningsdam tent opgeslaan het, nié net die nuus oor die Oscar Pistorius moordsaak nie, maar ook die stand van sake met die weer.

Diederik Louwrens het in die reën vertel waarom hy, sy ma Barbara en pa Stefan nie eerder by die huis in die bed met ‘n warm beker koffie is nie.

“Ons hengel hier, want wanneer dit só aanhou reën is die visse meer geneig om te byt.”

Hy spog dat hulle reeds ‘n karp van sowat 4,5kg uitgetrek het.

Stapeltjies stene en uitgebrande hout is ‘n aanduiding dat die Louwrense en Oscar, hulle Jack Russel wat hy sê nie na die paralimpiese atleet vernoem is nie, al vir ‘n ruk lank die oewer langs die dam hulle tydelike tuiste noem.

“Ons is nou maar net ‘n paar dae hier, van die naweek se kant af, en sodra ons nou dink ons het ‘n lekker tyd langs die dam gehad, sal ons huiswaarts keer.”

Intussen het die Suid-Afrikaanse Weerdiens voorspel dat die reën eers teen die naweek sal verminder. Net die tyd sal leer of die Louwrense tot dan nog vir hengel sal kans sien.